Fréttir

Andleg áföll ef þjónusta stenst ekki væntingar

Ýmsir hafa orðið til að benda á frétt á vef Morgunblaðsins í gær. Þótt væntanlega sé hún að hluta sett fram í léttum dúr má samt segja að hún tengist umfjöllunarefni ferðamálaráðstefnunnar þann 16 nóvember næstkomandi. Á ráðstefnunni verða eins og fram hefur komið gæðamál í ferðaþjónustu tekin til umfjöllunar. Í fréttinni er einmitt fjallað er um gæði, eða e.t.v. fremur skort á gæðum í ferðaþjónustu. Greint er frá því að árlega fái þó nokkrir japanskir ferðamenn alvarleg taugaáföll vegna þeirrar þjónustu og þess viðhorfs sem þeir mæta í París höfuðborg Frakklands. Vitnað er í sálfræðing sem segir að viðkvæmir ferðamenn geti brotnað saman þegar glansmyndir þeirra af ákveðnu landi standast ekki í raunveruleikanum. Slík tilfelli verða æ algengari með auknum ferðamannastraumi og þeim hefur nú verið gefið nafnið "Parísar-einkennið?, að sögn sálfræðingsins. Japanskir ferðamenn munu vera sérstaklega viðkvæmir fyrir slíku enda eiga þeir mikilli kurteisi að venjast heima fyrir og verða því oft fyrir miklu áfalli þegar þeir kynnast ruddaskap annarra þjóða. Frétt mbl.is Myndin er tekin á ferðamálaráðstefnunni í fyrra.
Lesa meira

Nýir áfangastaðir hjá Iceand Express

Iceland Express hefur tilkynnt um fjölgun áfangastaða næsta sumar. Mun félagið bjóða flug frá 14 borgum erlendis til Keflavíkur, auk þess sem flogið verður á milli Kaupmannahafnar og Akureyrar. Nýju staðirnir eru París, Ósló, Bergen, Basel í Sviss, Billund í Danmörku og Eindhoven í Hollandi. Flogið verður einu sinni til þrisvar í viku á þessa nýju áfangastaði. Þá mun Iceland Express líkt og í fyrarsumar fljúga til og frá Alicante, Berlín, Frankfurt Hahn, Friedrichshafen, Gautaborg, Kaupmannahöfn, London og Stokkhólmi.
Lesa meira

Fjölgun erlendra ferðamanna

Erlendum ferðamönnum fjölgaði um 6,2% í ágúst síðastliðnum og 14,5% í september, miðað við sömu mánuði í fyrra, samkvæmt talningum Ferðamálastofu í Leifsstöð. Fyrstu 9 mánuði ársins fóru rúmlega 325 þúsund erlendir ferðamenn um flugstöðina á sama tímabili í fyrra voru þeir rúmlega 303 þúsund talsins. Nemur aukningin 7,2%. Flestir ferðamenn koma frá Bretlandi, Bandaríkjunum, Þýskalandi og Danmörku. Sé fyrst litið á ágúst þá er ágæt aukning frá öllum mörkuðum. Allir meginmarkaðir skila verulegri fjölgun. Sem fyrr segir er 14,5% aukning í september. Þar eru Norðurlöndin að skila fjölgun upp á 2.085 ferðamenn og Bretland 1.343. Er fróðlegt að líta nokkur ár aftur í tímann til að skoða þá miklu fjölgun sem orðið hefur á komum ferðamanna utan háannar. Þannig nemur fjölgunin frá september 2002, þ.e. á sl. 4 árum, 61,4% og munar um minna fyrir íslenska ferðaþjónustu. Frá áramótum, eða fyrstu níu mánuði ársins, nemur fjölgunin sem fyrr segir 7,2% á milli ára eða tæplega 22 þúsund ferðamönnum. Af þeirri aukningu eru tæplega 4 þúsund að koma frá Norðurlöndunum, 3.400 frá Bretlandi, 1.761 frá Bandaríkjunum og 1.620 frá löndum á meginlandi Evrópu sem talin eru sérstaklega. Í talningum Ferðamálastofu eru ferðamenn frá 15 löndum taldir sérstaklega en aðrir eru taldir sem ein heild. Í þessum hópi hefur orðið hlutfallslega mest fjölgun frá áramótum. Líkt og áður hefur komið fram hefur einmitt verið ákveðið að fjölga um áramót þeim löndum sem talin eru sérstaklega í Leifsstöð. Ársæll Harðarson forstöðumaður markaðssviðs Ferðamálastofu segir ánægjulegt að sjá að aukningin í ár sé hlutfallslega meiri utan sumartíma en sumarmánuðina og sé það í samræmi við stefnumótun um að lengja ferðamannatímabilið. T.d komu fleiri ferðamenn í september í ár en í júní fyrir 2 árum. Frá áramótum til loka september   2005 2006 Mism. % Bandaríkin                     46.040 47.801 1.761 3,8% Bretland                       47.473 50.936 3.463 7,3% Danmörk                        29.466 31.030 1.564 5,3% Finnland                       6.757 7.128 371 5,5% Frakkland                      18.818 19.360 542 2,9% Holland                        9.659 9.633 -26 -0,3% Ítalía                         8.386 8.161 -225 -2,7% Japan                          4.420 4.846 426 9,6% Kanada                         2.874 3.334 460 16,0% Noregur                        20.027 22.053 2.026 10,1% Spánn                          5.958 7.348 1.390 23,3% Sviss                          6.250 5.571 -679 -10,9% Svíþjóð                        21.373 21.384 11 0,1% Þýskaland                      34.317 34.935 618 1,8% Önnur þjóðerni                 41.583 51.699 10.116 24,3% Samtals: 303.401 325.219 21.818 7,2% Heildarniðurstöður úr talningunum er að finan hér á vefnum undir liðnum Talnaefni
Lesa meira

Úttekt á deiliskipulagi á ferðamannastöðum

Eins og áður hefur komið fram er nú innan Ferðamálastofu unnið að fjölmörgum verkefnum í samræmi við samþykkta Ferðamálaáætlun fyrir árin 2006-2015. Á næstu vikum mun nokkrum þeirra ljúka. Eitt þeirra verkefna sem er lokið er úttekt á stöðu deiliskipulags á ferðamannastöðum. Þegar unnið er að framkvæmdum á ferðamannastöðum hvort sem um er að ræða opinbera aðila eða einkaaðila þá verður að liggja fyrir samþykkt deiliskipulag. Sé það ekki til þarf að vinna það áður en hægt er að ráðast í framkvæmdir eða úrbætur á svæðinu. Nú er í úttekt Ferðamálastofu hægt að sjá hver staðan er varðandi einstaka staði. Í framhaldi af úttektinni er nú unnið innan stofnunarinnar að forgangsröðum fyrir þá staði sem ekki hafa verið deiliskipulagðir. Skoða úttekt Ferðamálastofu á deiliskipulagi á ferðamannastöðum (PDF)
Lesa meira

Iceland Naturally kynnt í London

Iceland Naturally verkefnið fyrir Bretlandsmarkað hófst með formlegum hætti í London í byrjun vikunnar. Að Iceland Naturally í Evrópu standa Icelandair, Bláa lónið, Flugstöð Leifs Eiríkssonar og Iceland Spring water, auk íslenska ríkisins. Skrifstofa Ferðamálastofu í Frankfurt stýrir verkefninu.   Athöfnin fór fram í glæsilegum salarkynnum á St.Martin?s Lane hotel að viðstöddum um 150 gestum úr ferðaþjónustu og viðskiptalífi í London. Stephen Brown, svæðisstjóri Icelandair á Bretlandi, bauð gesti velkomna, sem voru meðal annars Sturla Böðvarsson samgönguráðherra og Sverrir Haukur Gunnlaugsson sendiherra í London, sem báðir fluttu ávörp. Samgönguráðherra sagði meðal annars í ávarpinu: ,,Eftir þá reynslu sem fengist hefur vestan hafs var ákveðið að hefja sams konar starf í Evrópu í þeirri bjargföstu trú að samstarf þessara aðila sé mun öflugri leið til markaðssetningar og hún verði mun víðtækari. Þannig er ekki aðeins verið að fjalla um náttúru Íslands og allt sem hún hefur uppá að bjóða heldur líka framleiðslu og þjónustu og ekki síður menningu sem við erum líka rík af.? Einnig sagði hann mikilvægt að fá fleiri fyrirtæki til samstarfs undir merkjum Iceland Naturally svo slagkrafturinn verði enn meiri.? Líkt og fram hefur komið snýr Iceland Naturally í Evrópu að Bretlandi, Þýskalandi og Frakklandi.   Boðið var uppá léttar veitingar og létta tónlist sem leikin var af Gitar Islancio. Að sögn Daviðs Jóhannssonar forstöðumanns Ferðamálastofu í Frankfurt, sem hefur umsjón með framkvæmd Iceland Naturally, þótti viðburðurinn takast vel og er þetta annar af þremur viðburðum sem marka upphaf Iceland Naturally í Evrópu. Þriðji viðburðurinn í fer fram í París í byrjun Nóvember. Formaður Iceland Naturally er Ingimundur Sigurpálsson.   Meðfylgjandi myndir voru teknar á St.Martin?s Lane hotel sl. mánudag.   Fulltrúar aðstandenda Iceland Naturally verkefnisins við glæsilegt íslistaverk sem gert var sérstaklega fyrir þetta tilefni.   Sturla Böðvarsson samgönguráðherra flytur ávarp sitt. Edda Sólveig Gísladóttir, markaðsstjóri Bláa lónsins og Stephen Brown, svæðisstjóri Icelandair. Rob Bates, sem sér um kynningarmál fyrir Icelandair UK, ásamt starfsmönnum frá Discover the World ferðaskrifstofunni. Séð yfir salinn.
Lesa meira

Iceland Express skoðar innanlandsflug

Iceland Express er með til skoðunar hefja innanlandsflug hér á landi, á næsta vori. Áformað er að fljúga sex sinnum á dag til Akureyrar og fjórum sinnum á dag til Egilsstaða. Frá þessu er greint í frétt Morgunblaðsins í dag. Fram kemur í viðtali við forsvarsmenn félagsins að þeir telji sig geta boðið lægri fargjöld á innanlandsleiðum en nú tíðkast. Félagið undirbýr einnig að bjóða upp á flug til Boston og New York á næsta ári, að því er fram kemur fréttinni.
Lesa meira

Uppskeruhátíð ferðaþjónustunnar á Norðurlandi

Þann 9. nóvember næstkomandi verður í annað sinn haldin uppskeruhátið ferðaþjónustunnar á Norðurlandi. Þangað eru sem fyrr boðaðir allir sem starfa að ferðamálum á Norðurlandi. Að þessu sinni er Austur Húnavatnssýsla gestgjafinn. Mæting er við upplýsingamiðstöðina að Brautarhvammi á Blönduósi kl. 11:00.  Matur og skemmtun verður í boði gestgjafanna en eins og í fyrra mun hver og einn sjá um gistingu fyrir sig.  Tilboð á gistingu er í athugun og verður auglýst eins fljótt og hægt er.  Skráning fer fram á heimasíðu MFN www.nordurland.is eða í gegnum netfangið: nordurland@nordurland.is og er fólk hvatt til að skrá sig sem fyrst og helst fyrir 2. nóvember.  Hátíðin í fyrra heppnaðist mjög vel og verður þessi ekki síðri að sögn aðstandenda sem hvetja alla til að taka þátt og mæta hress á Blönduós og skemmta sér með öðrum ferðaþjónustuaðilum á norðurlandi.   
Lesa meira

Gengið frá sölu hlutafjár í Icelandair Group

FL Group hefur gengið frá sölu á öllu hlutafé sínu í Icelandair Group. Þrír hópar fjárfesta hafa keypt meirihluta hlutafjár í félaginu eða 50,5% hlut og Glitnir sölutryggir óselt hlutafé í eigu FL Group. Þar af hefur Glitnir þegar ráðstafað, til fjárfesta, starfsfólks og stjórnenda Icelandair Group, allt að 16% hlut. Allt að þriðjungi hlutafjár í Icelandair Group verður boðið til kaups í almennu hlutafjárútboði í umsjón Glitnis. Icelandair Group er eignarhaldsfélag utan um 12 sjálfstæð rekstrarfélög í flugrekstri og ferðaþjónustu. Starfsmenn félagsins eru 2.700 og velta félagsins á þessu ári er áætluð 54 milljarðar íslenskra króna. Rekstri félagsins er skipt í 3 meginsvið; Áætlunarflug millilanda, leigu- og fraktflug á erlendum mörkuðum og ferðaþjónustu á Íslandi. Meginundirstaða rekstrarins er millilandaflug Icelandair sem byggir á tengiflugi milli Evrópu og Ameríku með megináherslu á Ísland. Félagið flýgur til 22 áfangastaða beggja vegna hafsins og flutti á seinasta ári um eina og hálfa milljón farþega.Sjá nánar frétt mbl.is
Lesa meira

Iceland Naturally af stað í Evrópu

Verkefnið Iceland Naturally fyrir Evrópumarkað hófst formlega í Þýskalandi fyrr í mánuðinum. Um er að ræða samtarfsverkefni íslenska ríkisins og fyrirtækja þar sem náttúra Íslands og vörur eru kynnt á erlendum mörkuðum. Verkefninu verður stýrt frá skrifstofu Ferðamálastofu í Frankfurt. Góð reynsla hefur verið af Iceland Naturally verkefninu í Norður-Ameríku og því var afráðið að fara af stað með sambærilegt verkefni í Evrópu. Iceland Naturally í Evrópu var formlega ýtt úr vör með við opnun jarðvísindasýningar í Senckenberg Museum í Frankfurt, sem Iceland Naturally er styrktaraðili að, en á sýningunni er Ísland kynnt í sérstakri deild. Sýningin er farandsýning og verður sett upp í 5 öðrum borgum í Þýskalandi á næstu 16 mánuðum. Skrifstofa Ferðamálastofu í Frankfurt hafði veg og vanda að frágangi Íslandshluta sýningarinnar með góðri aðstoð Jarðvísindastofnunar H.Í. og nokkurra valinkunnra íslenskra ljósmyndara. Til gamans má geta þess að hinn kunni jarðvísindamaður Alfred Wegener setti fram ?Flekakenningu? sína á fyrirlestri í Senckenberg Museum í byrjun síðustu aldar. Nú um miðjan október verður Iceland Naturally síðan hleypt af stað í London og í París í nóvember. Sturla Böðvarsson samgönguráðherra flutti ávarp við opnun sýningarinnar í Frankfurt og fjallaði m.a. um mikilvæg samskipti Þýskalands og íslands á sviði ferðamála. Viðstödd opnunina auk ráðherra voru meðal annarra sendiherra Íslands í Þýskalandi, Ólafur Davíðsson, Ingimundur Sigurpálsson, formaður stjórnar Iceland Naturally verkefnisins, Davíð Jóhannsson, forstöðumaður markaðsskrifstofu Ferðamálastofu í Frankfurt, Ragnhildur Hjaltadóttir ráðuneytisstjóri, Helga Haraldsdóttir, skrifstofustjóri í samgönguráðuneytinu og Ársæll Harðarson, forstöðumaður markaðssviðs Ferðamálastofu. Icelandair átti líka sinn þátt í undirbúningi að viðburðinum og viðstaddir opnunina voru, svæðistjóri icelandair í evrópu, Einar Páll Tómasson og Þórður Bjarnason markaðsstjóri. Meðfylgjandi myndir voru teknar við opnunina. Forstöðumaður Senckenberg sfnsins tekur á móti Sturlu Böðvarssyni samgönguráðherra. Nokkrir í "eldri kantinum? gættu þess að allt færi vel fram. Íslensku kræsingarnar gerðu lukku að vanda. Hlýtt á setningarræður: Ólafur Davíðsson sendiherra, Sturla Böðvarsson samgönguráðherra, Irmgard Schwetzer fyrrum skipulagsmálaráðherra Þýskalands, Wolfgang Strutz forseti  Senckenberg stofnunarinnar, fulltrúi þýska menntamálaráðuneytisins, Volker Mosbrugger forstöðumaður Senckenberg stofnunarinnar og stjórnarformaður þýska rannsóknarráðsins. Sturla Böðvarsson á tali við Irmgard Schwetzer, fyrrum skipulagsmálaráðherra Þýskalands, og Volker Mosbrugger, forstöðumann Senckenberg stofnunarinnar og stjórnarformann þýska rannsóknarráðsins.  Jón Rafnsson bassaleikari  og Sigurgeir Sigmundsson gítarleikari fluttu ljúfa íslenska tóna.  
Lesa meira

Fjölgun áfangastaða næsta sumar

Næsta sumar verður væntanlega flogið til Íslands frá fleiri áfangastöðum í áætlanaflugi en nokkru sinni áður. Þá verða einnig nýjar tengingar í boði frá þekktum áfangastöðum. Meðal annars morgunflug frá Norðurlöndunum til Íslands og morgunflug frá Íslandi til Bandaríkjanna. Iceland Express hefur ekki kynnt sumaráætlun sína formlega en í vetur flýgur félagið til og frá Berlín, Frankfurt Hahn, Friedrichshafen, Kaupmannahöfn og London. Þá hefur verið boðað að næsta vor bætist við a.m.k. 3 nýir áfangastaðir hjá félaginu, þ.e. Osló, Bergen og París. Í fyrrasumar var einnig flogið á milli Akureyrar og Kaupmannahafnar og samkvæmt upplýsingum frá félaginu gæti London-Akureyri jafnvel bæst við sem flugleið næsta sumar. Samkvæmt upplýsingum frá Icelandair eykur félagið framboð sitt næsta vor um 17%. Gert er ráð fyrir um 160 ferðum á viku, sem er met í sögu félagsins. Nýju áfangastaðirnir sem Icelandair mun bjóða upp á frá og með næsta vori eru Bergen, Gautaborg og Halifax og verður flogið þrisvar til fjórum sinnum í viku á hvern stað. Ekki verður flogið til San Fransico næsta sumar. Helsta nýbreytni félagsins er hinsvegar sú að boðið verður upp á morgunflug til New York og Boston, sem og morgunflug frá Kaupmannahöfn, Stokkhólmi og Ósló til Íslands. Með þessu geta farþegar farið ?hina leiðina? miðað við það sem tíðkast hefur, þ.e. að fara frá Evrópu að morgni, áfram til Bandaríkjanna að morgni, koma frá Bandaríkjunum um miðnætti og halda áfram að næturlagi til Evrópu. Ekki er annað vitað að en að áætlanaflug British Airways frá London, sem og flug SAS á frá Osló, verði með óbreyttu sniði. Einnig hefur verið vikulegt flug til Egilsstaða frá Kaupmannahöfn á vegum Trans-Atlantic. Þá er ótalinn fjöldi ferða í leiguflugi allt næsta sumar, líkt og verið hefur. Ljóst er að aukið sætaframboð og fleiri áfangastaðir eru jákvæðar fréttir fyrir íslenska ferðaþjónustu. Ætti þetta að m.a. skapa grundvöll fyrir áframhaldandi aukningu í komu erlendra ferðamanna hingað til lands þótt þar ráði vissulega einnig fleiri þættir
Lesa meira