Fara í efni

ADS-samningur við Kína

Á árinu 2004 skrifuðu Ísland og Kína undir samkomulag um ferðamál (svonefndan ADS-samning "Approved Destination Status") sem m.a. gerir Kínverjum kleift að ferðast til Íslands í skipulögðum hópum. Samkomulagið opnar möguleika fyrir íslensk ferðaþjónustufyrirtæki til að sækja fram á þessum markaði.  

Skráning á island.is

Íslenskir aðilar sem óska eftir því að taka upp samstarf við kínverskar ferðaskrifstofur um ferðir samkvæmt ADS samningnum þurfa að skrá sig. Skráningareyðublað er aðgengilegt hér að neðan, sá sem fyllir það út þarf að skrá sig inn með rafrænum skilríkjum í gegnum island.is.  

Einstaklingur  - umsóknareyðublað:

Einstaklingar skrá sig inn með rafrænum skilríkjum á hlekknum hér að neðan.

Lögaðili - umsóknareyðublað:

Prókúruhafi fyrirtækis þarf að ganga frá skráningu. Prókúruhafi opnar hlekkinn hér að neðan, skráir sig inn á sínum rafrænu skilríkjum og velur félagið sem á að skrá.

Ætlast er til þess að þeir ferðaþjónustuaðilar sem annast móttöku ADS gesta hafi þekkingu á ADS samkomulaginu og hafi þess vegna burði til þess að vinna samkvæmt því.

Listi yfir íslenskar ferðaskrifstofur með ADS-skráningu

Kínverskar ferðaskrifstofur

Með samkomulaginu eru sett ströng og ítarleg skilyrði fyrir því hvaða aðilar í ferðaþjónustu í Kína geta haft umsjón með og fengið vegabréfsáritanir fyrir hópa kínverskra ferðamanna til Íslands og þar með inn á Schengen-svæðið, en auk þess kveðið á um hvernig að slíku skuli staðið og hvaða gögn þurfi að vera fyrir hendi.

Kínversk stjórnvöld tilnefna þær ferðaskrifstofur á sérstakan lista sem geta fengið leyfi í þessu skyni. Fylgir leyfinu ábyrgð og verði ferðaskrifstofa uppvís að misferli verður hún svipt því. Kínversk ferðaskrifstofa þarf ennfremur að vera í samstarfi við íslenska ferðaskrifstofu til þess að fá heimild til að koma með hópa til Íslands, en öll ábyrgð er á hendi kínversku ferðaskrifstofunnar.

Hér fyrir neðan er listi yfir kínverskar ferðaskrifstofur sem hafa leyfi til að skipuleggja ferðir til annarra landa, þar með talið Íslands.