Leiðbeiningar til ferðamanna um kröfur í Ferðatryggingasjóð
Hverjir geta sótt um endurgreiðslu?
Þeir sem telja sig eiga kröfu á Ferðatryggingasjóð vegna kaupa á pakkaferð eða samtengdri ferðatilhögun, sem ekki er framkvæmd í samræmi við samning, skulu leggja fram kröfu til Ferðatryggingasjóðs. Ferðamálastofa sér um uppgjör á kröfum fyrir hönd Ferðatryggingasjóðs.
Ferðaskrifstofum er skylt að vera aðilar að Ferðatryggingasjóði.
Hvað fæst endurgreitt?
Ferðatryggingasjóður endurgreiðir það fé sem farþegar hafa greitt vegna kaupa á pakkaferð eða samtengdri ferðatilhögun, sem ekki er framkvæmd að hluta eða fullu, vegna gjaldþrots eða ógjaldfærni ferðaskrifstofu eða niðurfellingar leyfis að frumkvæði Ferðamálastofu. Ferðatryggingasjóður stendur einnig straum af kostnaði vegna heimflutnigs farþega þegar flutningur ferðamanna er hluti af pakkaferðasamningi.
Gildir ekki um staka ferðatengda þjónustu
Ferðatryggingasjóður tryggir aðeins endurgreiðslu vegna pakkaferða eða samtengdrar ferðatilhögunar en ekki vegna kaupa á stakri ferðatengdri þjónustu svo sem stökum flugmiða eða stakri hótelgistingu. Í slíkum tilfellum verður kröfuhafi að gera kröfu í þrotabú viðkomandi eða beina kröfum að fyrirtækinu.
Hvernig er sótt um endurgreiðslu?
Þegar Ferðamálastofa fellir niður ferðaskrifstofuleyfi að eigin frumkvæði eða vegna gjaldþrots eða ógjaldfærni er birt áskorun til ferðamanna um að senda kröfu í tryggingarfé innan tiltekins frests. Kröfur eru sendar inn rafrænt nauðsynlegt er að skrá sig inn með rafrænum skilríkjum.
Hér er listi yfir virkar áskoranir um kröfulýsingar. Einungis er hægt að senda inn kröfur vegna pakkaferða á vegum ferðaskrifstofa sem birtar eru á listnaum.
Sjá áskoranir um kröfulýsingar
Krafa í Ferðatryggingasjóð eyðublað
Skilafrestur, uppgjör o.fl.
Ferðamenn þurfa að leggja fram skriflega kröfu, sjá eyðublað, innan tveggja mánaða frá birtingu áskorunar í Lögbirtingablaðinu. Kröfur sem berast eftir þann tíma eru ekki teknar til greina..
Hvenær fást kröfur greiddar?
Ferðamálastofa sér um uppgjör krafna og greiðir út samþykktar kröfur fyrir hönd Ferðatryggingasjóðs. Við uppgjör krafna eru ekki greiddir vextir eða annar kostnaður vegna kröfugerðar.
Kröfuhöfum er tilkynnt skriflega um ákvörðun Ferðamálastofu. Úrvinnsla tekur mislangan tíma eftir umfangi og fjölda krafna.
Niðurstöður Ferðamálastofu eru kæranlegar til ráðherra. Kærufrestur er 4 vikur frá dagsetningu ákvörðunar.
Kröfuhafar eru einnig hvattir til að kanna rétt sinn til endurgreiðslu hjá sínu kortafyrirtæki eða tryggingarfélagi.
Nánari upplýsingar
Fyrirspurnir er hægt að senda á netspjall Ferðamálastofu og á netfangið krofur@ferdamalastofa.is.
