Niðurfelld leyfi - ferðaskrifstofur

Niðurfelling að beiðni leyfishafa

Óski leyfishafi niðurfellingar ferðaskrifstofuleyfis verður hann að senda Ferðamálastofu formlega beiðni um niðurfellingu.

Beiðnina skal senda á netfangið mail@ferdamalastofa.is, ásamt greinargerð með þeim upplýsingum sem um er beðið hér að neðan:

• Hvort útistandandi séu kröfur vegna sölu á pakkaferðum.
• Upplýsingar um hvort farþegar séu í pakkaferð á vegum ferðaskrifstofunnar og/eða hvort einhverjir farþegar hafi keypt pakkaferð sem enn er ófarin.
• Staðfestingu á að engin starfsemi ferðaskrifstofu sé fyrir hendi.

Uppfæra þarf vef/vefi fyrirtækisins þannig að ekki sé boðið upp á leyfisskylda starfsemi þar eða loka vefnum ef rekstri er endanlega hætt.

Ef kröfur eru útistandandi vegna pakkaferða skal senda Ferðamálastofu ítarlegar upplýsingar um áætlaðar kröfur. Um er að ræða upplýsingar um:

• pakkaferðirnar, 
• nafn/nöfn þeirra sem keyptu pakkaferð og tengiliðaupplýsingar, 
• hversu mikið hefur verið greitt inn á ferðir, 
• hvort búið sé að greiða birgjum fyrir einhverja þjónustu sem var innifalin í pakkaferðum og/eða eru pakkaferðir að fullu greiddar til birgja. 

Telji Ferðamálastofa að frekari gagna sé þörf verður kallað eftir þeim sérstaklega.

Niðurfelling leyfis að frumkvæði Ferðamálastofu

Uppfylli leyfishafi ekki lagaskilyrði er Ferðamálastofu ýmist skylt eða heimilt að fella niður leyfi.

Ferðamálastofu er skylt að fella niður leyfi:

• Komi til ógjaldfærni eða gjaldþrots leyfishafa eða forsvarsmanns leyfishafa
• Forsvarsmaður leyfishafa er sviptur fjárræði.
• Ef trygging vegna sölu pakkaferða eða samtengdrar ferðatilhögunar fellur úr gildi eða fullnægir ekki lagaskilyrðum.

Ferðamálastofu er heimilt að fella niður leyfi:

• Ef leyfishafi eða forsvarsmaður leyfishafa uppfyllir ekki lengur skilyrði fyrir útgáfu leyfis
• Ef öryggisáætlun er ófullnægjandi
• Ef brotið er á annan hátt gegn ákvæðum laga um Ferðamálastofu nr. 96/2018.
• Ef ferðaskrifstofa uppfyllir ekki skilyrði laga um skil ársreikninga og annarra gagna vegna mats á fjárhæð tryggingar vegna sölu pakkaferða og/eða samtengdrar ferðatilhögunar
• Ef ferðaskrifstofa sinnir ekki ákvörðun Ferðamálastofu um hækkun tryggingarfjárhæðar 

Ferðaskrifstofuleyfi er fellt niður ef leyfishafi hefur ekki sinnt fyrirmælum eða ákvörðunum Ferðamálastofu að undangengnum ítrekunum.

Þegar leyfi er fellt niður er trygging ferðaskrifstofu innkölluð frá útgefanda ef um ábyrgðaryfirlýsingu er að ræða.

Ferðamálastofa birtir niðurfellinguna í Lögbirtingablaðinu og öðrum fjölmiðlum eftir því sem þörf er á skv. 2. mgr. 26. gr. a. laga um pakkaferðir og samtengda ferðatilhögun nr. 95/2018. Niðurfellingin er einnig birt á vef Ferðamálastofu.

Leyfishafi greiðir kostnaðinn við birtingu innköllunar krafna.

Við birtingu niðurfellingar kallar Ferðamálastofa eftir kröfum frá ferðamönnum sem telja sig eiga kröfu á hendur Ferðatryggingasjóði vegna ferða sem ekki eru farnar að hluta eða fullu.

Ferðamenn skulu lýsa kröfum sínum skriflega og skulu þær berast innan tveggja mánaða frá birtingu áskorunar um kröfulýsingar.

Ferðamálastofa tekur afstöðu til krafna sem berast og greiðir þær út fyrir hönd Ferðatryggingasjóðs.

Ferðamálastofa aflar upplýsinga um hvort farþegar séu í pakkaferðum á vegum ferðaskrifstofunnar og/eða hvort einhverjir farþegar hafi keypt pakkaferðir sem enn eru ófarnar. Þegar kröfur eru útistandandi vegna sölu pakkaferða er aflað upplýsinga um

• pakkaferðir,
• nafn/nöfn þeirra sem keyptu pakkaferð og tengiliðaupplýsingar,
• hversu mikið hefur verið greitt inn á ferðir,
• hvort búið sé að greiða birgjum fyrir einhverja þjónustu sem var innifalin í pakkaferðum og/eða er pakkaferðir að fullu greiddar til birgja.

Ferðamálastofa leitar samvinnu við flugfélög og/eða ferðaskrifstofur og tekur ákvörðun um heimflutning farþega ef við á. Farþegum er tilkynnt um stöðu og ákvörðun Ferðamálastofu.

Ef engar kröfur berast að kröfulýsingarfresti loknum og birtingarkostnaður hefur verið greiddur, þá sendir Ferðamálastofa staðfestingu um niðurfellingu til útgefenda ábyrgðaryfirlýsingar eða greiðir út af tryggingareikningi leyfishafa eftir því hvort á við.

Niðurfelld leyfi