Erlendir ferðaþjónustuaðilar með starfsemi á Íslandi
Hér er að finna upplýsingar um þær kröfur sem gerðar eru til erlenda ferðaþjónustuaðila sem koma með ferðahópa til Íslands án þess að opna starfsstöð hér á landi. Verkefnið var unnið af Ferðamálastofu ásamt Vinnumálastofnun og Samgöngustofu til þess að skýra þær kröfur sem gerðar eru til erlenda ferðaþjónustuaðila á Íslandi. Upplýsingarnar má einnig nálgast í PDF-útgáfu
Ferðaþjónustuaðilar innan EES/ESB
Ferðaþjónustuveitandi innan EES-/ESB-ríkja, sem kemur með erlenda ferðahópa hingað til lands getur óhindraður veitt þeim sína þjónustu hér á landi. Hann þarf ekki að sækja um leyfi til Ferðamálastofu og fellur því ekki undir leyfisskilyrði samkvæmt III. kafla laga um Ferðamálastofu nr. 96/2018 svo framarlega að hann uppfylli þau skilyrði sem starfseminni eru sett í heimalandinu.
Ferðaþjónustuaðilar utan EES- og ESB- ríkja
Ferðaþjónustuveitandi utan EES-/ESB-ríkja, hvort sem er einstaklingur eða lögaðili, sem kemur með erlenda ferðahópa hingað til lands hefur ekki heimild til að starfa hér á landi án atvinnuréttinda. Um hann gildi lög um atvinnuréttindi útlendinga og eru þau mál á forræði Vinnumálastofnunar.
Öryggisáætlanir
Ferðaþjónustuveitendum sem koma með ferðahópa hingað til lands er skylt til að útbúa skriflega öryggisáætlun fyrir hverja tegund ferðar. Öryggisáætlun skal ávallt vera til skrifleg á íslensku og ensku. Óheimilt er að fara með ferðahópa, innlenda eða erlenda, ef öryggisáætlun liggur ekki fyrir.
- Fyrirspurnir varðandi leyfisveitingar má senda á leyfisveitingar@ferdamalastofa.is
- Fyrirspurnir vegna öryggismála og öryggisáætlana má senda á oryggi@ferdamalastofa.is
Starfsmenn sem koma frá fyrirtækjum innan EES-/ESB-ríkja
Fyrirtæki skyldug til að skrá sig til Vinnueftirlitsins og þá starfsmenn sem hingað koma í gegnum vefinn www.posting.is Á þetta bæði við um starfsmenn sem eru evrópskir ríkisborgar og svo þá sem eru ríkisborgarar ríkja utan EES. Þegar um er að ræða síðari hópinn þá eru störf þeirra takmörkuð við 90 daga á almanaksári og starfsmaður þarf að sýna fram á heimild til dvalar í sendiríkinu. Vinnueftirlitið veitir formlega heimild fyrir viðkomandi til að koma hingað til lands sem hægt er að framvísa á landamærum.
Sjálfstætt starfandi ríkisborgarar EES ríkja eru einnig tilkynningarskyldir hjá Vinnueftirlitinu í gegnum vefinn www.posting.is.
Einstaklingar sem eru ríkisborgarar utan EES-/ESB-ríkja
Ríkisborgurum ríkja utan EES er skylt að sækja um og fá útgefið tímabundið atvinnuleyfi vegna allra starfa hér á landi nema þeir séu undanþegnir kröfu um atvinnuleyfi skv. langtímaundanþágu 22. gr. laga nr. 97/2002 eða skammtímaundanþágu 23. gr. sömu laga. Þau störf sem talin eru upp í undanþágu 23. gr. um skammtímavinnu eru tæmandi upptalning og önnur störf falla ekki undir hana, nema ökumenn fólksflutningsbifreiða sem fylgja bifreiðum til og frá landinu, og hópstjórar sem fylgja hópum ferðamanna til og frá landinu.
Verktakar
Mikilvægt er að huga að því að einstaklingum með ríkisfang utan EES er óheimilt að starfa hér á landi sem verktakar nema að þeir falli undir langtímaundanþágu 22. gr. eða störf þeirra falli undir undanþágu 23. gr. vegna skammtímavinnu. Einstaklingar með ríkisfang innan EES sem stunda hér verktakavinnu til skamms tíma en hafa alla jafna staðfestu í öðru Evrópuríki þurfa að tilkynna starfsemi sína til Vinnumálastofnunar. Ekki er hægt að sækja um tímabundin atvinnuleyfi fyrir verktaka sbr. ákvæði 6. gr. laganna.
Leiðbeiningar vegna atvinnuleyfa má nálgast hér, fyrirspurnir má senda á netfangið atvinnuleyfi@vmst.is
Upplýsingavefur vegna útsendra starfsmanna og erlendra þjónustuveitenda er www.posting.is og fyrirspurnir má senda á netfangið info@posting.is
Rekstrarleyfishafar sem eru með leyfi frá landi innan EES-svæðisins geta ekið með farþega í atvinnuskyni á Íslandi hafi þeir bandalagsleyfi frá sínu heimalandi. Þetta á eingöngu við um hópbíla, bíla fyrir 9 farþega og fleiri, og er í samræmi við Evrópureglugerð EC nr. 1073/2009
Aðilar sem stunda farþegaflutninga í atvinnuskyni á bílum sem eru fyrir 8 farþega og færri þurfa að sækja um rekstrarleyfi hjá Samgöngustofu samkvæmt lögum og reglum og skila inn viðeigandi gögnum frá sínu heimalandi.
Sjá nánar um skilyrði rekstrarleyfis
Eitt af skilyrðum leyfis er að lögheimili forráðamanns sé skráð innan Evrópska efnahagssvæðisins og geta aðilar utan EES því ekki fengið slíkt leyfi útgefið á Íslandi. Þeir aðilar sem ekki geta fengið rekstrarleyfi til farþegaflutninga af þessum sökum geta ráðið til sín aðila með rekstrarleyfi til að sjá um aksturinn.
Ökumaður þarf ávalt að vera með viðeigandi ökuréttindi til að mega keyra með farþega í atvinnuskyni eða með tákntölu 95 í ökuskírteini.
Öll ökutæki sem tilheyra rekstrarleyfum skulu skráð í notkunarflokkinn Ökutæki til farþegaflutninga í atvinnuskyni. Árleg aðalskoðun fylgir notkunarflokknum. Ef umsækjandi ætlar sér að notast við bílaleigubíla þurfa þeir að vera með gilda skoðun og vera skráðir í viðeigandi notkunarflokk.
