Fréttir

Ferðaskrifstofuleyfi Iceland round trip ehf. kt. 470498-3079, Funalind 11, 201 Kópavogi, hefur verið felld úr gildi þar sem ferðaskrifstofan hefur hætt starfsemi.

Ferðaskrifstofuleyfi Erlendis Travel ehf. kt. 550416-1310, Álftamýri 12, hefur verið fellt úr gildi þar sem ferðaskrifstofan hefur hætt starfsemi.

Opnað verður fyrir umsóknir vegna næstu úthlutunar úr Framkvæmdasjóði ferðamannastaða öðru hvoru megin við mánaðamótin september-október. Aðilar eru hvattir til að huga að umsóknum sínum í tíma og er ekkert því til fyrirstöðu að þeir hefji undirbúning nú þegar.

Umferðaröryggi erlendra ferðamanna er viðfangsefni Umferðarþings Samgöngustofu þann 5. október næstkomandi á Grand Hótel. Ferðamálastofa er meðal aðila sem koma að undirbúningi og framkvæmd þingsins og er yfirskriftin: „Velkomin, en hvað svo?“

Fosshótel Húsavík hefur bæst í hóp vaskra Vakafyrirtækja og flaggar með stolti þremur stjörnum superior og brons merki í umhverfishlutanum. Þar með eru 8 hótel undir hatti Íslandshótela komin með stjörnuflokkun Vakans. Auk þess eru veitingastaðir á vegum keðjunnar Haust, Bjórgarðurinn og Grand Restaurant allir með gæðaviðurkenningu Vakans.

Ferðamálastofa vill vekja athygli á að sala pakkaferða eða alferða (þar sem t.d. flutningur og gisting er selt saman) er leyfisskyld. Aðeins handhafar ferðaskrifstofuleyfa mega selja slíkar ferðir. Ferðamálastofa beinir því til fólks að varast leyfislausa aðila og kaupa pakkaferðir eingöngu af þeim sem eru með ferðaskrifstofuleyfi.

Samkvæmt talningum Ferðamálastofu og Isavia í Flugstöð Leifs Eiríkssonar voru brottfarir erlendra farþega frá Íslandi rúmlega 278.600 í júlí sem er 2.5% fjölgun miðað við júlí í fyrra. Fjölgunin í júlí byggir að mestu leyti á Bandaríkjamönnum sem hafa aukið hlutdeild sína til muna. Rúmlega 27% fleiri Bandaríkjamenn fóru frá Leifsstöð í júlí í ár en á sama tíma í fyrra. Norðurlandabúum, Bretum, Frökkum, Þjóðverjum og Kanadamönnum, sem einnig tilheyra mikilvægum markaðssvæðum fyrir Ísland, fækkaði hins vegar um 9-19% í júlí á milli ára.

Nú er opið fyrir umsóknir um styrki frá NATA, samstarfssamningi Íslands, Færeyja og Grænlands á sviði ferðamála. Umsóknafrestur rennur út á miðnætti 5. september. Sótt er um á vef NATA á rafrænum eyðublöðum sem þar eru.

Ferðamálastofa vinnur nú að kynningu á nýrri löggjöf á sviði ferðamála sem taka mun gildi 1. janúar 2019. Í dag voru send bréf til ferðaskrifstofa, ferðaskipuleggjenda og skráðra bókunarþjónusta þar sem dregin eru fram þau atriði sem helst snerta rekstur þeirra.

Talnabæklingur Ferðamálastofu, Ferðaþjónusta á Íslandi í tölum, er jafnan mikið notaður. Í honum eru teknar saman og settar fram myndrænt og í texta, ýmsar tölulegar staðreyndir um íslenska ferðaþjónustu - upplýsingar sem handhægt er að geta haft aðgang að með einföldum hætti á einum stað. Nýjasta útgáfan er aðgengileg á vefnum okkar.