Fréttir

Friðheimar í Reykholti í Bláskógabyggð er nýjasti þátttakandinn í Vakanum og fyrsta fyrirtækið í uppsveitum Árnessýslu til að fá viðurkenningu Vakans. Hún var afhent við hátíðlega athöfn í gær og við sama tækifæri vígt nýtt hús sem hýsir eldhús, skrifstofur og fundaraðstöðu.

Extreme Iceland hlaut nýverið viðurkenningu Vakans og bronsmerki í umhverfishluta. Extreme Iceland er alhliða ferðaskrifstofa og ferðaskipuleggjandi, sem tók til starfa árið 2010 og hefur á stuttum tíma farið úr fámennu fjölskyldufyrirtæki í 100 manna vinnustað.

Ársskýrsla Ferðamálastofu fyrir árið 2016 komin út og er aðgengileg hér vefnum. Í henni er yfirlit um þau fjölbreyttu verkefni sem Ferðamálastofa sinnti á árinu.

Í dag fékk Hótel Bifröst gæðaviðurkenningu Vakans afhenta. Flokkast Hótel Bifröst nú sem þriggja stjörnu hótel samkvæmt viðurkenndum gæðaviðmiðum Vakans. Óskum við öllum starfsmönnum hjartanlega til hamingju með áfangann.

Efnahags- og framfarastofnunin, OECD, kynnir í næstu viku nýja skýrslu um íslensk efnahagsmál. Slík skýrsla er gefin út á tveggja ára fresti. Í skýrslunni er að þessu sinni sérstök umfjöllun um stöðu ferðaþjónustunnar og í ljósi þess boðar fjármála- og efnahagsráðuneytið til málstofu í samstarfi við Seðlabanka Íslands og atvinnuvega- og nýsköpunarráðuneytið. Málstofan er öllum opin en yfirskrift hennar er What is the Key to Sustainable Destination Development in Iceland? (Hver er lykillinn að sjálfbærri þróun ferðamannastaða á Íslandi?)

Það er með sannri ánægju sem við segjum frá því að Hótel Vestmannaeyjar er nýjasti þátttakandinn í Vakanum og flokkast nú sem þriggja stjörnu hótel superior, fyrst hótela á Íslandi. Einnig fær Hótel Vestmannaeyjar bronsmerki í umhverfishluta Vakans.

Rúmlega 146 þúsund erlendir ferðamenn fóru frá landinu í maí síðastliðnum samkvæmt talningum Ferðamálastofu í Flugstöð Leifs Eiríkssonar eða 22.000 fleiri en í maí á síðasta ári. Fjölgunin nemur 17,8% milli ára.

Ferðamálastofa, markaðsstofur landshlutanna og Safetravel vinna nú að því að endurskoða upplýsingaveitu til ferðamanna. Í því felst m.a. breytt skipulag upplýsingamiðstöðva og almennt hvernig upplýsingum er miðlað til ferðafólks. Af því tilefni var á dögunum haldið málþing í Borgarnesi þar sem stefnt var saman þeim sem eiga aðkomu að málaflokknum með einum eða öðrum hætti.

Frekari skref í rafrænni þjónustu Ferðamálastofu hafa nú verið stigin með því að færa umsóknir fyrir Vakann inn í þjónustugátt stofnunarinnar. Með því er umsóknaferlið einfaldað fyrir bæði viðskiptavini og stofnunina.

Árlegur talnabæklingur Ferðamálastofu, Ferðaþjónusta á Íslandi í tölum, er nú kominn út. Þar má á einum stað finna ýmsar hagnýtar upplýsingar um íslenska ferðaþjónustu.