Fréttir

Rannsóknamiðstöð ferðamála, Ferðamálastofa, Markaðsstofa Norðurlands og Akureyrarstofa bjóða til málstofu mánudaginn 2. nóvember kl. 14-15 í anddyri Borga, rannsókna- og nýsköpunarhúsinu, við Háskólann á Akureyri. Þar heldur erindi Brent Mitchell, bandarískur sérfræðingur um þjóðgarða, friðlýst svæði og leiðir til að efla starf almennings og félagasamtaka í náttúruvernd.

Norðursigling á Húsavík er handhafi Umhverfisverðlauna Ferðamálastofu 2015. Ráðherra ferðamála, Ragnheiður Elín Árnadóttir, iðnaðar og viðskiptaráðherra, afhenti verðlaunin á Ferðamálaþingi í Hofi á Akureyri í dag. Verðlaunin hafa verið veitt árlega frá árinu 1995 og er þetta því 21. árið í röð sem verðlaunin eru veitt.

Metþátttaka er á Ferðamálaþinginu í Hofi á Akureyri á morgun. Fyrir þá sem ekki komast á staðinn verður hægt að fylgjast með þinginu í beinni útsendingu á netinu.

Allt stefnir í fjölmennt Ferðamálaþing á Akureyri þann 28. október. Vert er að ganga sem fyrst frá skráningu, ekki síst til að tryggja sértilboð á flugi og gistingu. Yfirskriftin í ár er Stefnumótun svæða – Stjórnun og skipulag (e. Strategic Planning for Tourism).

Vegna verkfalls SFR hefur verið ákveðið að framlengja aftur frest til að skila inn umsóknum vegna styrkja frá Framkvæmdasjóði ferðamananstaða og rennur fresturinn út fimmtudaginn 22. október kl. 16. Sótt er um í gegnum Þjónustugátt Ferðamálastofu.

Tvö fyrirtæki bættust við í Vakann á dögunum. Annars vegar Ensku húsin við Langá á Mýrum, sem er fyrsta gistiheimilið í Vakanum og hins vegar South Iceland Adventure, ungt ferðaþjónustufyrirtæki á Hvolsvelli.

Þjónusta Ferðamálastofu skerðist vegna verkfalls SFR sem að óbreyttu mun standa yfir frá fimmtudegi 15. október til og með þriðjudagsins 20. október.

Í gær var undirritaður samstarfssamningur milli Samtaka ferðaþjónustunnar, Slysavarnafélagsins Landsbjargar og Ferðamálastofu fyrir hönd Vakans um auknar forvarnir og öryggi í ferðaþjónustu. Markmiðið með samningnum er að bæta námsframboð og þjálfun starfsmanna í afþreyingarferðaþjónustu á Íslandi með hliðsjón af þeim kröfum sem gerðar eru í Vakanum - gæða- og umhverfiskerfi ferðaþjónustunnar.

Um 123 þúsund erlendir ferðamenn fóru frá landinu í september síðastliðnum samkvæmt talningum Ferðamálastofu í Flugstöð Leifs Eiríkssonar eða 35 þúsund fleiri en í september á síðasta ári. Aukningin nemur 39,4% milli ára og hefur hún ekki mælst svo há milli ára í september frá því Ferðamálastofa hóf talningar. Fjöldinn frá áramótum er nú kominn yfir eina milljón.

Í dag kynntu Ragnheiður Elín Árnadóttir ráðherra ferðamála og Grímur Sæmundsen formaður Samtaka ferðaþjónustunnar nýja ferðamálastefnu.