Kynningarfundur vegna umsókna um styrki í Framkvæmdasjóð ferðamannastaða fyrir árið 2019 verður haldinn á Veitingahúsinu Greifanum á Akureyri (efri hæð) miðvikudaginn 10. október næstkomandi kl. 13:00. Fundurinn verður einnig í beinni útsendingu á netinu.
Á fundinum mun starfsfólk Ferðamálastofu og Nýsköpunarmiðstöðvar Íslands fara yfir umsóknarferlið og svara spurningum en eins og fram hefur komið mun Nýsköpunarmiðstöð Íslands veita umsækjendum leiðbeiningar við undirbúning og gerð umsókna.
Einkaaðilar, starfsmenn sveitarfélaga og sveitarstjórnarfólk er sérstaklega hvatt til þess að mæta á fundinn. Samkvæmt reglum sjóðsins styrkir verkefni á ferðamannastöðum í eigu eða umsjón sveitarfélaga jafnt sem einkaaðila.
Fundurinn verður í beinni útsendingu á Facebook-síðu Ferðamálastofu og verður upptaka af honum einnig aðgengileg að fundi loknum.
Vakin er athygli á að ekki verður um fleiri kynningarfundi að ræða.
Nánari upplýsingar um sjóðinn og yfirstandandi umsóknarferli má nálgast á upplýsingasíðu um umsóknir á slóðinni www.ferdamalastofa.is/umsoknir