Ferðavenjur Íslendinga 2025 og ferðaáform 2026
Ný ferðavenjukönnun Ferðamálastofu sýnir að árið 2025 var líflegt ferðaár meðal landsmanna, þó lítilsháttar samdráttur hafi orðið í utanlands- og dagsferðum. Áform fyrir árið 2026 benda til áframhaldandi stöðugleika og fjölbreyttra ferðavenja. Sérstaklega vekur athygli að töluverður hluti landsmanna hyggst ferðast til að fylgjast með almyrkva í ágúst. Könnunin var unnin af Gallup fyrir Ferðamálastofu í janúar og febrúar síðastliðnum.
Helstu niðurstöður um ferðalög landsmanna 2025
Utanlandsferðir
- 78% landsmanna ferðuðust til útlanda árið 2025, þremur prósentustigum færri en árið 2024 og tveimur færri en árið 2023. Farnar voru að jafnaði 2,9 ferðir til útlanda, álíka margar og 2023 og 2024.
- Meðalfjöldi gistinótta var 24,9 nætur og hefur ekki áður mælst hærri. Til samanburðar voru gistinætur 24 árið 2023 og 23 árið 2024.
- Um helmingur fór í borgarferð (52%) og sólarlandaferð (50%), ríflega þriðjungur (35%) heimsótti vini og ættingja (35%) og um fimmtungur fór í vinnutengda ferð (21%).
- Algengustu áfangastaðir voru Spánn og Portúgal (55% landsmanna), Bretlandseyjar (31%), Danmörk (24%), Bandaríkin og Kanada (15%), Þýskaland (13%) og Ítalía (13%).
Ferðalög innanlands
- Um 84% landsmanna ferðuðust innanlands árið 2025, sem er svipað hlutfall og undanfarin ár. Farnar voru að jafnaði 5,7 ferðir, tæplega einni færri en árið 2024, en álíka margar og árið 2023.
- Um 77% ferða voru tengdar fríi, skemmtiferð eða áhugamálum, 12% voru vegna vinnu eða viðskipta og 11% af öðrum ástæðum.
- Meðalfjöldi gistinátta var 16,6, álíka margar og árið 2023 en um hálfri nótt færri en árið 2024. Hlutdeild Suðurlands var hæst (27% gistinótta) og næsthæst var hlutdeild Norðurlands (26%). Þar á eftir komu Vesturland (12%), höfuðborgarsvæðið (12%), Austurland (11%), Vestfirðir (8%), hálendið (3%) og Reykjanes (1%).
- Flestir nýttu sumarmánuðina til ferðalaga; 67% ferðust í júlí, 60% í ágúst og 55% í júní.
- Af afþreyingu sem greitt var fyrir nýttu 55% sund eða jarðböð, 22% heimsóttu safn eða sýningu, 19% sóttu leikhús eða tónleika, 13% stunduðu veiði og 13% sóttu tónlistar- eða bæjarhátíð.
Dagsferðir
- Tæplega sjö af hverjum tíu landsmönnum fóru í dagsferð, fjórum prósentustigum færri en árið 2024 og 2023.
- Farnar voru að jafnaði 6,4 dagsferðir, um hálfri ferð færri en 2023 og 2024.
- Helstu ástæður dagsferða voru að komast út fyrir bæinn (47%), heimsækja vini eða ættingja (37%), brjóta upp daglegt amstur (31%) og fara í sund, baðlón eða sjósund (22%).
| Hlutfall (%) sem fór í ferð | Meðalfjöldi ferða | Meðalfjöldi gistinótta | |||||||
| 2023 | 2024 | 2025 | 2023 | 2024 | 2025 | 2023 | 2024 | 2025 | |
| Innanlandsferðir | 84% | 85% | 84% | 5,8 | 6,5 | 5,7 | 16,7 | 17,2 | 16,6 |
| Dagsferðir | 70% | 72% | 68% | 5,9 | 5,9 | 6,4 | 5,9 | ||
| Utanlandsferðir | 80% | 81% | 78% | 2,7 | 2,8 | 2,9 | 23,5 | 22,9 | 24,9 |
Viðhorf og ánægja
Athygli vekur að nær helmingur landsmanna (48%) segist oftast fara á sömu staði þegar ferðast er innanlands, á meðan mikill meirihluti (75%) vill upplifa nýja staði. Þetta bendir til þess að tækifæri séu til að dreifa ferðamönnum betur um landið. Þrátt fyrir aukna umræðu um umhverfismál segist meirihluti landsmanna (65%) ekki ætla að fækka utanlandsferðum af þeim sökum og aðeins 18% segjast finna fyrir meiri ánægju af innanlandsferðum en utanlandsferðum.
Meðmælaskor (NPS*) fyrir innanlandsferðir mælist 14,4 árið 2026 og hefur verið svipað síðustu ár. Niðurstöðurnar benda til þess að hlutfall þeirra sem myndu mæla með ferðalögum innanlands sé nokkuð stöðugt, en jafnframt að töluverður hópur sé hlutlaus eða ólíklegur til að mæla með slíkum ferðum. Helsta skýringin á því er hátt verðlag,
Þegar svarendur voru spurðir um valda þætti ferðaþjónustunnar kemur fram að ánægja er misjöfn eftir þáttum. Af þeim níu þáttum sem spurt var um fær þjónusta og gestrisni hæstu einkunn (7,2). Næst koma merkingar og upplýsingar á ferðamannastöðum, öryggi á ferðamannastöðum og gæði ferðaþjónustunnar almennt, sem öll mælast með einkunn um 6,7.
Ánægja með fjölbreytni í afþreyingu mælist 6,6, en lægri einkunnir fá frammistaða ferðaþjónustunnar í umhverfis- og sjálfbærnismálum (6,2) og almennt ástand vinsælla ferðamannastaða (6,1). Lægst mælist ánægja með fjölda ferðamanna á ferðamannastöðum (5,5) og ástand vega og öryggi í tengslum við vegi (4,8).
Ferðaáform á árinu 2026
Fjórðungur landsmanna hyggst ferðast meira innanlands í ár en í fyrra, nærri þrír af hverjum fimm (57%) álíka mikið og tæplega fimmtungur (18%) minna. Þá segjast 27% ætla að ferðast meira til útlanda en í fyrra, tæplega helmingur svipað (49%) og áður en um fjórðungur minna (25%).
Til samanburðar sögðust heldur fleiri ætla að ferðast meira innanlands árið 2025 (29%) en nú í ár, en hlutfallið var svipað árið 2024 (25%). Áform um auknar utanlandsferðir hafa hins vegar lítið breyst milli ára, en hlutfallið var lægra árið 2024 (21%). Jafnframt hefur dregið lítillega úr þeim sem hyggjast ferðast minna til útlanda milli ára.
Sumarbústaðaferðir eru vinsælar en 53% landsmanna hyggjast fara í slíkar ferðir, svipað og undanfarin ár. Borgarferðir erlendis virðast hins vegar á niðurleið og fara úr um 50% síðustu tvö ár í 45% í ár. Á móti kemur að sólarlandaferðir aukast lítillega, fara úr úr um 40% í 42%. Heimsóknir til vina og ættingja standa að mestu í stað.
Niðurstöðurnar benda jafnframt til þess að náttúra, landslag og aðgengi að útivist skipti miklu máli þegar Íslendingar velja sér áfangastaði innanlands. Vestfirðir eru áfram sá áfangastaður sem flestum landsmönnum þykir spennandi að heimsækja (17%), líkt og í fyrri könnunum. Austurland fylgir þar á eftir (13%), en einnig er töluverður áhugi á hálendinu (8%) og Norðurlandi (7%). Suðurland heldur áfram að laða til sín ferðalanga (7%), á meðan aðrir áfangastaðir mælast með lægra hlutfall. Heildarniðurstöðurnar benda til þess að áhugi á helstu ferðasvæðum haldist nokkuð stöðugur milli ára, með Vestfirði áfram í forystu.
Almyrkvi 12. ágúst 2026
Í ágúst næstkomandi verður almyrkvi sýnilegur frá vestasta hluta landsins, en slíkur náttúruviðburður er tiltölulega sjaldgæfur og hefur aðeins sést á Íslandi tólf sinnum frá landnámi. Í ljósi þessa einstaka viðburðar var sérstaklega kannað hversu margir hefðu vitneskju um almyrkvann og hvort þeir hyggðust fylgjast með honum. Niðurstöðurnar benda til að margir Íslendingar séu meðvitaðir um þennan viðburð og hafi áhuga á að fylgjast með þegar hann verður sýnilegur. Um 23% sögðust ætla að fylgjast með almyrkvanum heiman frá sér og um 19% að þeir myndu líklega ferðast til að sjá hann. Um 20% sögðust hafa áhuga á að fylgjast með honum en vissu ekki hvar best væri að sjá hann. Nærri tveir af hverjum fimm ætluðu sér ekki að fylgjast með almyrkvanum.
Um könnunina
Gallup framkvæmdi könnun fyrir Ferðamálastofu um ferðavenjur landsmanna árið 2025 og ferðaáform þeirra árið 2026 dagana 14. janúar til 17. febrúar 2026. Úrtakið samanstóð af 2.515 einstaklingum, 18 ára og eldri, og svaraði 1.121 einstaklingur (44,6% svarhlutfall). Niðurstöður voru vigtaðar eftir kyni, aldri og búsetu. Könnunin hefur verið framkvæmd árlega í 17 ár og veitir mikilvæga yfirsýn yfir þróun ferðavenja landsmanna. Í samantektarskýrslu um könnunina eru niðurstöður settar fram í 13 köflum með myndrænum hætti og í töflum, auk leiðbeininga um túlkun niðurstaðna. Fremst eru dregnar saman helstu niðurstöður og þaðan vísað í nánari umfjöllun um einstakar spurningar.
* NPS (Net Promoter score): Um er að ræða alþjóðlegan mælikvarða sem segir til um mismun á hlutfalli þeirra sem eru tilbúnir að mæla með t.d. áfangastað, fyrirtæki eða vöru og hlutfalli þeirra sem eru líklegri til að mæla gegn sömu þáttum. NPS skor getur verið á bilinu -100 til 100.