Ferðamenn á eigin vegum

Þann 12. ágúst 2026 verður almyrkvi á sólu sýnilegur á Íslandi. Almyrkvaslóðin liggur yfir Vestfirði, Vesturland, Höfuðborgarsvæðið og Reykjanesskaga. Atburðurinn mun leiða til tímabundinnar fjölgunar ferðamanna innan þessara svæða og til aukinnar umferðar. Álag á innviði getur orðið mikið þar sem t.a.m. mikil umferð getur myndast skyndilega og hegðun fólks er ófyrirséð.

Mætið snemma, dveljið lengi og komið undirbúin.

Skipulag og öryggi

Undirbúið ferðina í góðum tíma fyrir almyrkvadaginn.
Aflið ykkur upplýsinga áður en lagt er af stað t.d. varðandi bílastæði og aðgengi.
Veljið ykkur öruggan stað til að fylgjast með myrkvanum.
Mætið tímanlega á svæðið þar sem þið hyggist fylgjast með myrkvanum.
Virðið merkt svæði, leiðbeiningar starfsfólks og lokanir eða umferðartakmarkanir/stýringar sem kunna að vera í gildi.
Ekki stöðva ökutæki á vegum eða í vegköntum til að fylgjast með almyrkvanum heldur leggja aðeins á merktum bílastæðum.
Forðist að fara út fyrir stíga og skilgreind svæði.
Hafið með ykkur mat, vatn og nauðsynlegan búnað t.d. skjólgóðan fatnað.
Almyrkvann skal aðeins skoða með viðeigandi hlífðargleraugum.

Veður og væntingar

Almyrkvi er náttúruatburður sem er háður veðri og skyggni.
Þrátt fyrir góðan undirbúning er ekki hægt að ábyrgjast aðstæður eða útsýni.
Vegna mögulegrar umferðaraukningar má gera ráð fyrir að ferðatími og tími á viðkomandi stað verði lengri en áætlað.
Ferðamenn á almyrkvasvæðum eru hvattir til að vera sjálfbærir á almyrkvadegi, klæða sig eftir aðstæðum og hafa með sér nauðsynlegan búnað, vatn og nesti.
Ferðamenn eru hvattir til að njóta upplifunarinnar á ábyrgan og öruggan hátt, óháð veðri.

Náttúruvernd og ábyrg ferðahegðun

Mikilvægt er að hafa í huga:

Halda sig á merktum stígum og svæðum.
Virða lokanir og aðgangstakmarkanir.
Nota fyrirfram skilgreind bíla- og áningarstæði.
Forðast að ganga á viðkvæmum gróðri, mosa eða lausum jarðvegi.
Sýna varkárni á varasömum og viðkvæmum svæðum.
Virða einkalönd og friðlýst svæði.
Skilja ekkert eftir sig nema fótspor.