Ferðaþjónusta í tölum - Samantekt fyrir árið 2025
Í ,,Ferðaþjónusta í tölum – janúar 2026“ má sjá samantekt um ýmsar stærðir í íslenskri ferðaþjónustu fyrir árið 2025, m.a. brottfarartalningar erlendra farþega frá landinu um Keflavíkurflugvöll, skráðar gistinætur, nýtingu á hótelum og nokkrar niðurstöður er varða dvöl ferðamanna á Íslandi s.s. um tilgang ferðar, dvalarlengd og heimsóknir eftir landshlutum.
Um 2,2 milljónir erlendra farþega frá landinu árið 2025*
Brottfarir erlendra farþega frá landinu um Keflavíkurflugvöll voru um 2,25 milljónir árið 2025 samkvæmt talningum Ferðamálastofu og Isavia sem er svipaður fjöldi og árin 2023 og 2024. Brottfarir síðustu þrjú ár benda til þess að fjöldi ferðamanna sé sambærilegur og á árunum 2017-2019.
Bandaríkjamenn voru fjölmennastir árið 2025, um 654 þúsund talsins eða þrír af hverjum tíu (29%) farþegum frá landinu. Þetta gerir um 33 þúsund fleiri Bandaríkjamenn (+5,4% aukning) en árið 2024 og um 12 þúsund fleiri (+1,9%) en árið 2023. Áður höfðu þeir mest mælst á ársgrunni 2018, 695 þúsund. Bretar voru í öðru sæti, um 233 þúsund, um 33 þúsund færri (-12,5%) en árið 2024 og 52 þúsund færri (-18,3%) en árið 2023. Fjöldi Breta er langt frá því sem þeir voru á árunum 2016 til 2018 þegar þeir voru jafnan um og yfir 300 þúsund á ári. Í þriðja sæti voru Þjóðverjar, um 148 þúsund, aðeins fleiri en árið 2024 (+4,3%) og 2023 (+6,3%). Fjórða sætið skipuðu Kínverjar, 124 þúsund, sem er veruleg fjölgun frá 2024 (+29,2%) og 2023 (+122,1%). Þeir hafa ekki áður mælst svo margir, en höfðu mest verið 105 þúsund árið 2018. Samanlagt voru þessar fjórar þjóðir um helmingur (51,4%) brottfara erlendra farþega.
Um 38% brottfara voru að sumri til (júní-ágúst), um 32% að vori eða hausti (apríl-maí/sept-okt) og 30% yfir vetrar-mánuðina (jan-mars/nóv-des). Í samanburði við fyrri ár hefur hlutfallsleg dreifing eftir árstíðum verið nokkuð stöðug.
Tilgangur ferðar og heimsóknir eftir landshlutum
Langflestir, eða ríflega níu erlendir ferðalangar af hverjum tíu (92,3%) voru í fríi á Íslandi árið 2025 samkvæmt könnun Ferðamálastofu. Um 2,5% voru í heimsókn hjá vinum og ættingjum, 2,3% í námsferð, heilsutengdri ferð eða öðrum persónulegum erindum og 2,9% í annars konar tilgangi. Um 86% ferðamanna heimsóttu höfuðborgarsvæðið, 79% Suðurland, 65% Reykjanes, 49% Vesturland, 34% Norðurland, 31% Austurland og 15% Vestfirði.
Meðalfjöldi gistinótta 7,1 nótt
Ferðamenn dvöldu að jafnaði 7,1 nótt á Íslandi 2025 samkvæmt könnun Ferðamálastofu, svipað og árið áður. Af tíu fjölmennustu þjóðernunum dvöldu Þjóðverjar lengst (9,8 nætur) og Frakkar næstlengst (9,3 nætur). Bretar dvöldu hins vegar styst (5,0 nætur) og Kínverjar næst styðst (5,9 nætur). Þegar dvalarlengd er skoðuð eftir mánuðum var hún lengst í ágúst (8,4 nætur) og júlí (8,2 nætur), en styst í febrúar og desember (5,4 nætur).
Skráðar gistinætur 2025 aldrei fleiri
Gistinætur í landinu voru rúmlega tíu milljónir árið 2025 samkvæmt gistináttagrunni Hagstofunnar**, 848 þúsund fleiri (+9,1%) en árið 2024 og 675 þúsund fleiri (+7,1%) en árið 2023. Þar við bætast gistinætur útlendinga í óskráðri gistingu en upplýsingar um þær liggja ekki fyrir. Um 4,5 milljónir, eða tvær af hverjum fimm gistinóttum voru að sumarlagi.
Nærri níu af hverjum tíu gistinóttum 2025 mátti rekja til útlendinga eða um 8,8 milljónir. Það er 1,1 millljón fleiri gistinætur (+13,8%) en árið 2024 og 842 þúsund fleiri (+10,5%) en árið 2023. Gistinætur landsmanna 2025 mældust um 1,3 milljónir, töluvert færri en árin 2020 til 2024. Mest fóru þær í 1,7 milljónir árið 2021.
Helmingur gistinótta á hótelum tilkomnar vegna bandarískra, breskra og íslenskra ferðalanga
Ríflega helmingur (53,5%) allra skráðra gistinótta árið 2025, eða 5,4 milljónir, voru á hótelum, samkvæmt gögnum Hagstofu. Það er 3,3% aukning frá 2024 og 2023 þegar fjöldinn var tæplega 5,3 milljónir. Af hótelgistinóttum mátti rekja 1,5 milljónir til Bandaríkjamanna, 598 þúsund til Breta og 577 þúsund til Íslendinga, samanlagt um helming allra hótelgistinótta. Í næstu sætum voru Þjóðverjar og Kínverjar.
Nýting á hótelum dróst saman á fjórða ársfjórðungi 2025
Á heilsársgrunni var herberganýting 67,3% á landsvísu árið 2025 og 74,8% á höfuðborgarsvæðinu. Það gerir 2,1% betri nýtingu á landsvísu en árið 2024, en 0,5% lakari á höfuðborgarsvæðinu. Nýting var betri í flestum mánuðum fyrstu þrjá ársfjórðunga ársins 2025 en dróst saman á fjórða ársfjórðungi, mest í desember, þegar hún var 13,1% lakari á landsvísu og 17,5% lakari á höfuðborgarsvæðinu.
Best nýting mældist í ágúst 2025: 93% á Suðurlandi, 92% á höfuðborgarsvæðinu og 91% á Austurlandi. Júlí fylgdi fast á eftir með 97% nýtingu á Austurlandi, 94% á Suðurlandi og 89% á höfuðborgarsvæðinu. Nýting fór niður fyrir 50% á landsvísu tvo mánuði ársins, í janúar og desember.
* Fjöldatölur taka mið af brottfarartalningum Ferðamálastofu og Isavia á Keflavíkurflugvelli og ber að skoða tölurnar með þeim fyrirvörum sem aðferðafræðin felur í sér.
**Hagstofa Íslands hefur nýlega lokið endurskoðun á gögnum um gistinætur. Endurskoðunin var gerð í kjölfar þess að gistinætur Íslendinga höfðu verið ofmetnar á árunum 2020–2024 og gistinætur útlendinga þar af leiðandi vanmetnar. Af þessum sökum þurfti að endurmeta dreifingu gistinátta og áætla að nýju fjölda gistinátta á þá gististaði sem ekki skiluðu inn fullnægjandi gistiskýrslum. Tölur fyrir árin 2020–2024 breyttust því töluvert frá fyrri birtingum, sem hefur áhrif á eldri samantektir um gistinætur sem birtar hafa verið í Ferðaþjónustan í tölum.