77.500 ferðamenn í janúar
Um 77.500 erlendir ferðamenn fóru frá landinu í janúar síðastliðnum samkvæmt talningum Ferðamálastofu í Flugstöð Leifs Eiríkssonar eða 14.800 fleiri en í janúar á síðasta ári. Aukningin nemur 23,6% milli ára. Ferðamönnum hefur fjölgað verulega í janúar á síðustu árum og hafa aldrei verið fleiri en í ár. Meira en fjórfalt fleiri ferðamenn komu í janúarmánuði 2016 en í janúar árið 2010.
Bretar og Bandaríkjamenn 54% ferðamanna
Um 78% ferðamanna í janúar árið 2016 voru af tíu þjóðernum. Bretar voru fjölmennastir eða 35,5% af heildarfjölda en næstir komu Bandaríkjamenn (18,6%).
Þar á eftir fylgdu Kínverjar (4,3%), Þjóðverjar (4,2%), Frakkar (3,2%), Danir (2,7%), Norðmenn (2,5%), Japanir (2,3%), Svíar (2,2%) og Kanadamenn (2,0%).
Af einstaka þjóðernum fjölgaði Bretum, Bandaríkjamönnum og Kínverjum mest milli ára en 5.835 fleiri Bretar komu í janúar í ár en í sama mánuði í fyrra, 5.051 fleiri Bandaríkjamenn og 1.173 fleiri Kínverjar. Þessar þrjár þjóðir báru uppi aukninguna í janúar milli ára eða 81,5% af heildaraukningu.
Ferðamönnum fækkaði hins vegar frá nokkrum þjóðum, m.a. Svíþjóð, Danmörku, Frakklandi og Japan.
Fjöldi Breta og Norður Ameríkana hefur meira en sexfaldast frá 2010
Þegar litið er til fjölda ferðamanna í janúarmánuði má sjá verulega fjölgun frá árinu 2010. Þannig hefur fjöldi ferðamanna frá Bretlandi og Norður Ameríku meira en sexfaldast, fjöldi ferðamanna frá Mið- og S-Evrópu nærri þrefaldast og ferðamönnum frá löndum sem lenda í hópnum annað meira en fjórfaldast. Ferðamönnum frá Norðurlöndunum hefur hins vegar fjölgað í minna mæli.
Hlutfall Breta eykst en Norðurlandabúa minnkar
Samsetning ferðamanna hefur breyst mikið frá árinu 2010 eins og sjá má af myndinni hér til hliðar. Í janúar síðastliðnum voru Bretar ríflega þriðjungur ferðamanna en ríflega fimmtungur árið 2010. Norðurlandabúar voru fjórðungur ferðamanna árið 2010 en árið 2016 var hlutfall þeirra komið í 8%. Hlutfall N-Ameríkana í janúar er mun hærra í ár en fyrri ár en hlutfall Mið- og S-Evrópubúa hins vegar lægra en árin á undan. Hlutfall ferðamanna í janúar frá öðrum mörkuðum hefur hin síðari ár hins vegar verið á svipuðu róli.
Ferðir Íslendinga utan
Um 30 þúsund Íslendingar fóru utan í janúar síðastliðnum eða 2.700 fleiri en árið 2015. Um er að ræða 9,9% fleiri brottfarir en í janúar 2015.
Nánari upplýsingar
Talningar Ferðamálastofu ná yfir allar brottfarir frá landinu um Leifsstöð. Skiptingu milli landa má sjá í töflunni hér að neðan og nánari upplýsingar undir liðnum Tölur og útgáfur / Fjöldi ferðamanna hér á vefnum.
