70.900 ferðamenn í desember

Um 70.900 erlendir ferðamenn fóru frá landinu í desember síðastliðnum samkvæmt talningum Ferðamálastofu í Flugstöð Leifs Eiríkssonar eða 17.100 fleiri en í desember 2014. Aukningin nemur 31,9% milli ára. Fjöldi erlendra ferðmanna um Keflavíkurflugvöll var því um 1.262.000 á árinu 2015. Gera má ráð fyrr að tölurnar nái til um 97% ferðamanna sem hingað komu. Ótaldir eru þeir sem komu um aðra millilandaflugvelli og farþegar Norrænu en heildaruppgjör fyrir árið mun liggja fyrir síðar í mánuðinum.

Ferðamenn í desmeber

Aukning eftir mánuðum:

• 34,5% í janúar
• 34,4% í febrúar
• 26,8% í mars
• 20,9% í apríl
• 36,4% í maí
• 24,2% í júní
• 25,0% í júlí
• 23,4% í ágúst
• 39,4% í september
• 49,3% í október
• 34,1% í nóvember
• 31,9% í desember

Bretar og Bandaríkjamenn 51,5% ferðamanna

10 fjölmennustu þjóðerni í desember 2015Um 76% ferðamanna í desember síðastliðnum voru af tíu þjóðernum. Bretar voru langfjölmennastir eða 34,3% af heildarfjölda og næstfjölmennastir voru Bandaríkjamenn (17,2%). Þar á eftir fylgdu Kínverjar (6,8%), Pólverjar (3,8%), Þjóðverjar (2,9%), Japanir (2,5%), Danir (2,3%), Frakkar (2,3%), Norðmenn (2,0%) og Kanadamenn (2,0%).

Af einstaka þjóðernum fjölgaði Bretum, Bandaríkjamönnum og Kínverjum mest milli ára í desember en 6.700 fleiri Bretar komu í desember í ár en í fyrra, um 5.400 fleiri Bandaríkjamenn og um 1.900 fleiri Kínverjar. Þessar þrjár þjóðir báru uppi 81,9% aukningu ferðamanna í desember.

Fjöldi ferðamanna í desember á tímabilinu 2002-2015

Ferðamenn eftir markaðssvæðumFerðamönnum í desember hefur fjölgað verulega frá því Ferðamálastofa hóf talningar á Keflavíkurflugvelli árið 2002 og þá einkum síðastliðin fjögur ár. Þannig hefur heildarfjöldi ferðamanna í desembermánuði meira en þrefaldast frá árinu 2011 og munar þá mestu um aukningu Breta sem hafa meira en fimmfaldast, N-Ameríkana sem hafa meira en fjórfaldast og þeirra sem flokkast undir ,,önnur þjóðerni“ sem hafa nærri fjórfaldast. Ferðamenn frá Mið- og S-Evrópu hafa á sama tíma tvöfaldast en Norðurlandabúum hefur einungis fjölgað lítilsháttar.

Tæplega 1,3 milljón á árinu

Á árinu 2015 fóru tæplega 1,3 milljónir erlendra ferðamanna frá landinu um Keflavíkurflugvöll eða um 292.700 fleiri en á árinu 2014. Um er að ræða 30,2% aukningu milli ára. Veruleg aukning hefur verið frá flestum mörkuðum nema Norðurlöndunum sem hafa staðið í stað. Aukningin hefur verið 51,6% frá N-Ameríku, 33,5% frá Bretlandi, 19,6% frá Mið- og S-Evrópu og 41,7% frá öðrum löndum sem ekki eru talin sérstaklega og flokkast undir ,,annað“.

Ferðir Íslendinga utan

Um 32.900 Íslendingar fóru utan í desember síðastliðnum eða um 4.800 fleiri en í desember árið 2014. Á árinu 2015 fóru um 450.300 Íslendingar utan eða um 50.300 fleiri en á árinu 2014. Aðeins einu sinni áður hafa ferðir Íslendinga utan verið fleiri á einu ári en það var árið 2007.

Nánari upplýsingar

Talningar Ferðamálastofu ná yfir allar brottfarir frá landinu um Leifsstöð þannig að inn í tölunum eru erlendir ríkisborgarar búsettir hérlendis. Skiptingu milli landa má sjá í töflunni hér að neðan og nánari upplýsingar undir liðnum Tölur og útgáfur / Fjöldi ferðamanna hér á vefnum.

Ferðamenn desember 2015 tafla


Athugasemdir