Viðhorf ferðamanna á miðhálendi Íslands

Í þessari skýrslu eru birtar niðurstöður kannana á viðhorfi ferðamanna á miðhálendi Íslands sem eru hluti af verkefninu „Áætlun um ferðamennsku á miðhálendi Íslands“. Markmið verkefnisins er að afla gagna sem notuð yrðu í stefnumótun fyrir ferðamennsku á miðhálendinu og byggir á sjálfbærri nýtingu þess. Verkefnið var unnið undir stjórn Önnu Dóru Sæþórsdóttur og Rögnvalds Ólafssonar við Háskóla Íslands í samvinnu við og með stuðningi Ferðamálastofu og atvinnuvega- og nýsköpunarráðuneytisins.

Í desember árið 2012 var gefin út lokaskýrsla fyrir verkefnið með titlinum: Áætlun um ferðamennsku á miðhálendi Íslands: Niðurstöður rannsókna. Þar kom fram að enn skorti þekkingu á viðhorfi ferðamanna á norðurhluta hálendisins og var lagt til að bæta úr því með könnunum í Öskju og Kverkfjöllum sumarið 2013. Það hefur nú verið gert með fjárstuðningi frá Ferðamálastofu og Vatnajökulsþjóðgarði.