Fara í efni

Samningur um eflingu söguferðaþjónustu

Ragnheiður Elín og Rögnvaldur handsala samninginn eftir undirritun.
Ragnheiður Elín og Rögnvaldur handsala samninginn eftir undirritun.

Síðastliðinn föstudag skrifuðu Ragnheiður Elín Árnadóttir, ráðherra ferðamála, og Rögnvaldur Guðmundsson, formaður Samataka um söguferðaþjónustu, undir nýjan samning um eflingu söguferðaþjónustu á Íslandi.

Undirritunin fór fram í Víkingaheimum í Reykjanesbæ í tengslum við félagsfund og málþing samtakanna. Ráðuneytið mun styrkja samtökin um 3 milljónir króna á árinu 2014 til að vinna að verkefninu og verður árangur metinn í árslok.

Um samninginn

Í samningnum segir m.a: "Meginmarkmið samstarfsins er að vinna að frekari uppbyggingu og þróun söguferðaþjónustu um land allt þar sem leitast verður við að auka upplifun ferðamanna og afþreyingu sem byggir á menningararfi. Unnið verður að stækkun og eflingu samtakanna, m.a. til að treysta samstarfsvettvang ólíkra aðila, s.s. safna og setra, sem miðla menningararfi til ferðamanna og til að tryggja aðkomu söguferðaþjónustu (heritage tourism) að stefnumörkun og þróunarstarfi í ferðaþjónustu. Stuðlað verður að lengingu opnunartíma í samvinnu við „Ísland allt árið“, aukinni fagmennsku og gerð heildstæðra ferðapakka."

Samtökin stækkuð

Samtök um söguferðaþjónustu (www.sagatrail.is) voru stofnuð árið 2006 af 18 aðilum í söguferðaþjónustu og hafa hingað til einbeitt sér að tímabilinu frá landnámi til siðaskiptanna um 1550. Nú eru félagar orðnir yfir 90 um allt land. Nýverið var ákveðið að stækka samtökin þannig að allir sem eru að vinna að með sögu svæða eða staða í ferðaþjónustu geta orðið fullgildir aðilar, óháð þeim tíma sem unnið er með. Eins sagnafólk og aðilar í sögulegu handverki. Þá getur áhugafólk, fræðimenn, ferðaskrifstofur o.fl. fengið aukaaðild að samtökunum.