Ný skonnorta bætist í hvalaskoðunarflota Norðursiglingar

Ný skonnorta bætist í hvalaskoðunarflota Norðursiglingar
Norðursigling Hildur eftir

Nýjasti bátur hvalaskoðunarfyrirtækisins Norðursiglingar á Húsavík, skonnortan Hildur, kom til heimahafnar í gær eftir siglingu frá Danmörku. Áætlað er að Hildur verði klár til siglinga með farþega á hvalaslóðir Skjálfanda innan fárra daga.

Hildur var áður hefðbundinn fiskibátur, smíðuð á Akureyri árið 1974, en var siglt utan til Egernsund í september í fyrra. Þar var henni breytt í tvímastra skonnortu og er óumdeilanlega með glæsilegustu skipum í íslenska hvalaskoðunarflotanum.

Norðursigling er fjölskyldufyrirtæki, stofnað á Húsavík árið 1995 og var fyrst hvalaskoðunarfyrirtækja á Íslandi til að bjóða upp á reglulegar hvalaskoðunarferðir. Yfirstjórn og rekstur er í höndum þriggja kynslóða. Hildur er sjötti bátur fyrirtækisins og yfir sumartímann starfa allt að 60 manns hjá Norðursiglingu.


Hildur á siglingu síðasta spölinn til Húsavíkur í fylgd með Hauki, öðrum báti Noðursiglingsr.


Svona leit Hildur út fyrir breytingar.

 


Athugasemdir