Lokun 2G og 3G farsímaþjónustu á Íslandi fyrir árslok 2025 – Hvað þýðir það fyrir ferðaþjónustuna?

Fjarskiptastofa hefur staðfest að 2G og 3G farsímaþjónusta á Íslandi verður aflögð í áföngum og að fullu hætt fyrir árslok 2025. Þetta er hluti af yfirfærslu yfir í nútímalegri og hraðvirkari 4G og 5G netkerfi.

Fjarskiptafyrirtækin hafa tilkynnt eftirfarandi áætlanir:

• Nova: Lokaði 2G þjónustu í janúar 2025 og hyggst slökkva á 3G þjónustu í lok ársins 2025 .
• Vodafone (Sýn hf.): Áformar að loka bæði 2G og 3G þjónustu fyrir árslok 2025 .
• Síminn: Lokaði 2G þjónustu í lok árs 2024 og stefnir á lokun 3G þjónustu í lok árs 2025

Allir þrír aðilar stefna að því að hætta 3G þjónustu fyrir árslok 2025. Sjá nánar í tilkynningu frá Fjarskiptastofu

Hverjar eru afleiðingarnar fyrir ferðaþjónustufyrirtæki?

Fyrirtæki í ferðaþjónustu, sérstaklega þau sem starfa á landsbyggðinni eða á afskekktum svæðum, þurfa að huga að eftirfarandi:

• POS-tæki og greiðslulausnir: Tæki sem byggja á 2G/3G tengingum munu hætta að virka.
• Öryggisbúnaður og GPS: Tæki sem senda gögn yfir eldri netkerfi, svo sem staðsetningarbúnaður í farartækjum, þurfa uppfærslu.
• Neyðarbúnaður: Tæki sem treysta á 2G/3G fyrir neyðarsamskipti verða óvirk.

Þá kemur fram í skýrslu Fjarskiptastofu að mikilvægt sé að tryggja að útbreiðsla nýrrar tækni verði ekki lakari en 2G og 3G og að hún verði aðgengileg þar sem 2G og 3G verður lokað. Skýrsla Fjarskiptastofu: Útfösun 2G og 3G.

Hvernig geta fyrirtæki undirbúið sig?

Ferðamálastofa hvetur fyrirtæki til að:

• Greina núverandi búnað: Meta hvaða tæki og kerfi byggja á 2G/3G.
• Hafa samband við þjónustuaðila: Staðfesta hvort búnaðurinn styðji 4G/5G og fá ráðleggingar um uppfærslur.
• Skipuleggja uppfærslu: Tryggja að öll tæki séu uppfærð fyrir lokun eldri netkerfa.
• Meta fjarskiptadekkun: Athuga hvort 4G/5G þjónusta nái til starfssvæða fyrirtækisins.
• Tryggja öryggi: Ganga úr skugga um að öryggiskerfi og neyðarbúnaður virki áfram með nýrri tækni.

Nánari upplýsingar

Fyrirtæki eru hvött til að hafa samband við sitt fjarskiptafyrirtæki til að fá nánari upplýsingar og ráðgjöf. Einnig er hægt að finna frekari upplýsingar á vef Fjarskiptastofu: fjarskiptastofa.is

Ef þú þarft frekari aðstoð eða ráðgjöf, ekki hika við að hafa samband við Ferðamálastofu.