Fara í efni

Gistinætur og gestakomur á hótelum í maí

Hagstofulogo
Hagstofulogo

Hagstofan hefur sent út frétt um gistinætur á hótelum í maí síðastliðnum sem voru 117.300 og er það sambærilegt við maí 2007. Gistinóttum fækkaði á höfuðborgarsvæðinu úr 83.000 í 79.800 eða um 4%. Á Norðurlandi fækkaði gistinóttum um rúmt 1%, úr 9.000 í 8.900, og á Austurlandi voru gistinætur sambærilegar við fyrra ár eða um 4.700.

Gistinóttum fjölgaði umtalsvert á Suðurlandi, úr 10.700 í 13.500, eða rúm 26%. Gistinóttum fjölgaði einnig um rúm 4% á samanlögðu svæði Suðurnesja, Vesturlands og Vestfjarða, úr 9.900 í 10.300.

Fjölgun gistinátta á hótelum á Suðurlandi í maí má bæði rekja til útlendinga (33%) og Íslendinga (14%). Fækkun gistinátta á öðrum landsvæðum milli ára má eingöngu rekja til útlendinga (-2%).

Gistinóttum á hótelum fyrstu fimm mánuði ársins fjölgaði um tæp 4% milli ára
Gistinætur á hótelum fyrstu fimm mánuði ársins voru 428.000 en voru 412.000 á sama tímabili árið 2007. Fjölgun varð á Suðurlandi um rúm 20%, á höfuðborgarsvæðinu um 4% og á Norðurlandi um 2% milli ára. Gistinóttum fækkaði á öðrum landsvæðum mest á Austurlandi um 13% og á samanlögðu svæði Suðurnesja, Vesturlands og Vestfjarða um tæp 8%. 

Fjölgun gistinátta fyrstu fimm mánuði ársins nær eingöngu til Íslendinga, 14%. Gistinætur útlendinga standa í stað á milli ára.

Athygli skal vakin á því að hér er eingöngu átt við gistinætur á hótelum, þ.e. hótelum sem opin eru allt árið. Til þessa flokks gististaða teljast hvorki gistiheimili né hótel sem eingöngu eru opin yfir sumartímann.

Tölur fyrir 2008 eru bráðabirgðatölur.