Ný skýrsla um þjóðhagslíkan fyrir ferðaþjónustuna og upptaka af kynningarfundi

Ný skýrsla um þjóðhagslíkan fyrir ferðaþjónustuna og upptaka af kynningarfundi
Sjóðböðin á Húsavík. -Mynd: visiticeland.com

Ný skýrsla ráðgjafarfyrirtækisins Hagrannsókna sf. um uppbyggingu þjóðhagslíkans fyrir ferðaþjónustuna er nú komin hér á vefinn. Einnig upptaka af opnum fyrirlestri um efnið sem fram fór í morgun. Skýrslan fjallar um viðfangsefnið með fræðilegum og stærðfræðilegum hætti en fyrirlesturinn nálgast það á almennari máta, fyrir stærri hóp áheyrenda. Sjá tengla að neðan inn á skýrsluna, upptöku af fyrirlestrinum og glærunum sem stuðst var við.

Hagrannsóknir sf. smíða nú á vegum Ferðamálastofu nýtt þjóðhagslíkan (geiralíkan) fyrir innlenda ferðaþjónustu, sem á að vera fullbúið í notendavænu viðmóti og tengt við almennt þjóðhagslíkan Hagstofu Íslands fyrir árslok 2023.

Fullbúnu er líkaninu ætlað að verða mikilvægt tæki til högg- og aðgerðagreiningar fyrir stjórnvöld og greinina (m.a. við áföll og búhnykki), meta áhrif ferðaþjónustunnar á efnahagslífið í heild (s.s. VLF og atvinnustig) og áhrif annarra þátta efnahagslífsins (s.s. gengis, verðlags, atvinnustigs og skatta) á ferðaþjónustuna. Líkaninu er einnig ætlað að spá fyrir um framlag ferðaþjónustunnar til efnahagslífsins og hagvaxtar í framtíðinni á grundvelli spáa um umsvif í ferðaþjónustu.

Í skýrslu Hagrannsókna sf. að þessu sinni er

  • gerð grein fyrir frumhönnun á líkaninu, sem er af DSGE gerð
  • framleiðslugeira hagkerfisins skipt í tvo hluta, ferðaþjónustu og aðrar framleiðslugreinar, sem hafa áhrif hvor á annan
  • dæmi um áhrif ytri breytinga erlendis á íslenska ferðaþjónustu sem og hagkerfið utan hennar
  • ítarleg tæknileg lýsing á líkaninu í viðauka

Nánari upplýsingar:


Athugasemdir