Flugleiðir stefna að 7% fjölgun ferðamanna

Flugleiðir stefna að 7% fjölgun ferðamanna
Ísland kynnt sem ákjósanlegur áfangastaður til ráðstefnuhalds og móttöku hvataferða

Flugleiðir stefna að því að ferðamönnum hingað til lands fjölgi um 7% á ári. Þetta kom fram í máli Harðar Sigurgestssonar, stjórnarformanns Flugleiða, á aðalfundi félagsins í gær.

 Verulegur árangur hefur sem kunnugt er náðst í að fjölga ferðamönnum til Íslands á undanförnum árum. Í töflunni hér að neðan, sem er meðal þess sem finna má hér á vefnum undir liðnum "Tölfræði", eru teknar saman tölur um fjölda ferðamanna sem koma til landsins með skipum og flugvélum frá árinu 1972. Ef t.d. eru bornar saman tölur fyrir árin 2002 og 1992 kemur í ljós að á þessu 10 ára tímabili fjölgar ferðamönnum um nær 95%, eða úr 142.600 ferðamönnum í 278.000. Jafn ljóst er að árangur sem þessi næst ekki fyrirhafnarlaust. Líkt og stjórnarformaður Flugleiða benti á í ræðu sinni í gær er Ísland að keppa við fjölda annarra áhugaverðra ferðamannastaða og væntanlega þurfi að verða framsækin þróun í greininni til að hún verði áfram samkeppnisfær.

Eins og fram kom á frétt hér á vefnum á dögunum eru flugsamgöngur við landið nú með allra besta móti. Í sumar lítur út fyrir að hér verði í ferðum þrjú flugfélög sem eru með áætlunarflug allt árið á stefnuskrá sinni og a.m.k. 5 til viðbótar sem halda upp áætlun yfir sumartímann. Þá hefur ný og stærri Norræna siglingar til landsins í vor sem væntanlega þýðir fjölgun ferðamanna sem koma til landsins sjóleiðina.

Erlendir ferðamenn sem koma til Íslands með skipum og flugvélum

1972 68.026 1988 128.830
1973 74.019 1989 130.503
1974 68.476 1990 141.718
1975 71.671 1991 143.459
1976 70.180 1992 142.560
1977 72.690 1993 157.326
1978 75.700 1994 179.241
1979 76.912 1995 189.796
1980 65.921 1996 200.835
1981 72.194 1997 201.654
1982 72.600 1998 232.219
1983 77.592 1999 262.605
1984 85.290 2000 302.900
1985 97.443 2001 295.000
1986 113.528 2002 277.900
1987 129.315    

Unnið úr tölum útlendingaeftirlitsins af Ferðamálaráði.

 


Athugasemdir