Bætt aðgengi - betri upplifun - Global Accessibility Awareness Day

Ferðamálastofa býður ferðaþjónustuaðilum og öðrum hagaðilum til viðburðar í tilefni af Global Accessibility Awareness Day, fimmtudaginn 21. maí n.k. frá kl. 10:00 - 11:00.

Viðburðurinn fer fram á Teams og verður í beinu streymi en nauðsynlegt að skrá sig.

Aðgengismál frá tveimur ólíkum sjónarhornum

Á viðburðinum fá þátttakendur innsýn í aðgengismál frá tveimur ólíkum en afar mikilvægum sjónarhornum — annars vegar frá notandanum sjálfum og hins vegar frá ferðaþjónustuaðila.

Aðalfyrirlesari er Shane Hryhorec, ástralskur áhrifavaldur, frumkvöðull og öflugur talsmaður bætts aðgengis. Shane hefur helgað líf sitt því að ryðja hindrunum úr vegi og bæta aðgengi. Í erindinu mun hann deila reynslu sinni af ferðalögum um heiminn sem hjólastólanotandi; hvað virkar vel, hvað mætti gera betur og hvað skiptir raunverulega máli þegar kemur að aðgengi í ferðaþjónustu.

Shane er einnig stofnandi Push Mobility, fyrirtækis sem þróar og framleiðir hjálpartæki fyrir fólk með fötlun.

Í gegnum verkefnið Wheel Around the World og samfélagsmiðla hefur Shane náð til milljóna áhorfenda, þar sem hann varpar ljósi á bæði áskoranir og tækifæri í ferðalögum fatlaðs fólks á einlægan og lifandi hátt.

Þá mun Vilborg Ásta Árnadóttir, markaðs- og upplifunarstjóri, hjá Sky Lagoon segja frá því hvernig hugað hefur verið að góðu aðgengi fyrir fatlaða í einu vinsælasta baðlóni landsins. Hún fjallar um hvernig markvisst hefur verið unnið að því að hanna upplifun sem tekur mið af fjölbreyttum þörfum gesta, ásamt áskorunum og tækifærum.

Hvatning til fyrirtækja að huga að góðu aðgengi 

Viðburðurinn er hluti af átaki Ferðamálastofu til að hvetja fyrirtæki til að huga að góðu aðgengi í íslenskri ferðaþjónustu. Með okkur í samstarfi eru lykilaðilar á sviðinu; Sjálfsbjörg, ÖBÍ og Húsnæðis- og mannvirkjastofnun.

Markmið viðburðarins er að veita innsýn, kveikja umræðu og styðja ferðaþjónustuaðila í að taka raunhæf skref í átt að bættu aðgengi.

Við hvetjum alla sem starfa í ferðaþjónustu – eða hafa áhuga á að bæta aðgengi fyrir alla – til að skrá sig á viðburðinn.