Rifstangi á Melrakkasléttu Gönguleið

Rifstangi er nyrsti tangi á meginlandi Íslands. Áður fyrr þá náði norður heimskautsbaugur inn á tangann og var hluti af Rifstanga því staðsettur norðan við heimskautsbauginn. Heimskautsbaugurinn er hins vegar genginn út af tanganum og liggur nú allur Rifstangi sunnan við bauginn. Rifstangi er engu að síður sá hluti meginlandsins sem er staðsettur næst heimskautsbaugi sem gerir hann að mögnuðum stað til að upplifa sólris og sólsetur. Einstakt er að horfa á sólina hverfa í sæinn þegar hún er að setjast og rísa úr honum við sólris. Mikið dýralíf er á staðnum og má gjarnan heyra í melrökkum sem eiga greni á þessum slóðum. Staðurinn er friðsæll og er mikil kyrrð í fjölbreyttu fuglalífinu sem kemur fram í misfögrum fuglasöng. Gönguleiðin hefst við afleggjarann sem er staðsettur í um 17 km keyrslufjarlægð frá Raufarhöfn. Þaðan er gengið vegslóðann niður að Rifi. Slóðinn er vel göngufær en verður grýttur þegar nálgast fer tangann. Á leiðinni sést Rauðinúpur vel í vestur og Hraunhafnartangi í austur. Frá tanganum er gengið kindaslóða að Rifshúsinu og svo aftur frá húsinu að vegslóðanum. Ef áhugi er að labba aðra leið til baka þá er hægt að fylgja vörðunum sem eru staðsettar á áshryggnum á austanverðu landinu. Sú leið er örlítið styttri en undirlag hennar er grýttara.