Reynisvatnshringur Hlaupaleið

Reynisvatnshringur er fjölbreytt utanvegahlaupaleið við Reynisvatn, lítið og friðsælt stöðuvatn austan við Grafarholt í Reykjavík. Vatnið er umlukið grónum skógi sem veitir skjól og laðar að fjölbreytt fuglalíf, einkum mófugla á vorin og sumrin. Greiðfær og vel merktur stígur liggur hringinn í kringum vatnið, um 1,3 km, en þessi leið er lengri hringur sem nýtir tengingu Reynisvatns við stígakerfi Austurheiða og fer út í holtin í kring. Leiðin er um 9,5 km með hóflegri hækkun, alls um 145 metrum, og hentar vel í æfingahlaup. Umhverfið er fjölbreytt: jökulsorfin grágrýtisholt, fornar jarðmyndanir, sprungur og misgengi setja svip sinn á landslagið, og gróðurfar er fjölbreytt með mosa, lyngmóum og graslendi. Bekkir eru á völdum stöðum við vatnið þar sem hægt er að setjast niður og njóta umhverfisins. Reynisvatn tengist stígakerfi sem spannar svæðið frá Rauðavatni yfir að Langavatni, svo auðvelt er að lengja eða breyta leiðinni. Bílastæði er við vatnið. Vatnshringurinn sjálfur er vel merktur en sá hluti leiðarinnar sem fer út í heiðina er það síður, svo gott er að þekkja leiðina eða hafa kort í úrinu.