Elliðavatnsbær að Þingnesi Gönguleið

Fjölbreytt og nánast flöt leið meðfram Elliðavatni, einu stærsta vatni á höfuðborgarsvæðinu, á mörkum Reykjavíkur og Kópavogs. Lagt er af stað frá Elliðavatnsbæ, gömlu og reisulegu bæjarstæði við norðanvert vatnið. Gengið er meðfram vatnsbakkanum um fjölbreytt gróðurlendi; birkikjarr, mólendi og votlendi þar sem fjölskrúðugt fuglalíf er allt árið. Víða er gott útsýni yfir vatnið og til fjalla, og við bakkann er nýlegur áningarstaður með palli og bekkjum þar sem tilvalið er að staldra við. Leiðin liggur út á Þingnes, lágan tanga sem skagar út í vatnið, en þar hafa fundist leifar af átján mannvirkjum frá fyrstu öldum Íslandsbyggðar og er staðurinn meðal merkari fornminjasvæða á höfuðborgarsvæðinu. Undirlagið er blandað náttúrulegt efni: mold, melur og grjót og leiðin er um 4,6 km, með óverulegri hækkun. Hún hentar því flestum og er góð bæði til rólegra hlaupa og útivistar með fjölskyldunni. Bílastæði er við upphafsstað.