Elliðaárhringur frá Elliðaárstöð Hlaupaleið

Þessi leið liggur hring um Elliðaárdal, eitt stærsta græna svæðið innan þéttbýlis Reykjavíkur og eitt vinsælasta útivistarsvæði borgarbúa. Þungamiðja dalsins eru Elliðaárnar, þekkt laxveiðiá þar sem um 2.500 laxar ganga upp á hverju sumri. Leiðin hefst við Elliðaárstöð, rafstöðina sem hóf raforkuframleiðslu árið 1921 og hefur nú verið endurgerð með sýningu, veitingum og leiksvæði. Þaðan er fylgt greiðfærum göngu- og hjólastígum meðfram ánum, um báðar kvíslar dalsins og yfir nokkrar af rúmlega tuttugu göngubrúm sem tengja svæðið. Í dalnum eru fjölmargir fossar, meðal annars Kermóafoss, Ullarfoss og Sjávarfoss, þar sem fyrstu laxar sumarsins veiðast oft. Skógrækt hófst í árhólmanum árið 1951 og hefur skilað víðfeðmum og gróskumiklum skógi sem er eitt helsta aðdráttarafl dalsins. Fuglalíf er auðugt; um 25 tegundir verpa í dalnum, og víða má sjá sögulegar minjar, meðal annars frá tíð Innréttinganna og frá stríðsárunum. Leiðin er um 12 km með lítilli hækkun, um 90 metrum, og hentar vel í æfingahlaup. Dalurinn er skjólsæll og því góður kostur í hvassviðri. Bílastæði eru við Elliðaárstöð, og Árbæjarsafn og Minjasafn Orkuveitunnar eru í grennd.