Ferðaþjónusta bænda - sóknarfæri til sveita

Ferðaþjónusta í dreifbýli er ein þeirra greina innan ferðaþjónustunnar sem hefur verið í miklum vexti í hinum vestræna heimi undanfarin ár. Ferðaþjónusta í dreifbýli spannar vítt svið en flestar skilgreiningar á greininni lúta að ákveðinni hugmyndafræði og ákveðinni nálgun í uppbyggingu. Þessi hugmyndafræði felur í sér að ferðaþjónusta í dreifbýli sé byggð á eiginleikum dreifbýlis hvað varðar eðli og umfang; staðbundnum auðlindum á sviði náttúru, sögu og menningu og feli í sér mikla þátttöku heimafólks. Ennfremur að uppbyggingin sé háð getu hvers svæðis til að þróa ferðaþjónustu án þess að það komi niður á umhverfislegum, félagslegum eða menningarlegum þáttum svæðisins.