Akureyri - Eyjafjörður. Stefnumótun í ferðamálum.

Með samþykkt atvinnumálanefndar Akureyrar þann 21. ágúst 1990 var stofnaður sérstakur vinnuhópur um ferðamál. Rætt var við aðila í ferðaþjónustu á Akureyri og víðar, aflað gagna og hugmynda og lögð fram stefnumörkun í ferðamálum fyrir Akureyrarbæ. Hópurinn telur að hlutverk bæjarins í ferðamálum eigi að einkennast af stefnumarkandi verkefnum og þátttöku í starfsemi sem lýtur að ferðaþjónustunni í heild. Þau verkefni sem falla undir þessa skilgreiningu eru að bærinn taki þátt í kynningu út á við og sé þátttakandi í upplýsingamiðstöð fyrir ferðamenn í samvinnu við aðila ferðaþjónustunnar. Hópurinn telur einnig mikilvægt að bæjaryfirvöld hafi náið samráð við ríkið í framkvæmd verkefna sem telja má ferðaþjónustunni til hagsbóta og þrýsti á um framkvæmd þeirra.