SAF auglýsir eftir framkvæmdastjóra

Samtök ferðaþjónustunnar hafa auglýst eftir framkvæmdastjóra. Erna Hauksdóttir, sem gegnt hefur starfinu frá stofnun samtakanna í nóvember 1998, hefur sagt starfi sínu lausu frá og með 1. desember næstkomandi. 

Samtök ferðaþjónustunnar eru hagsmunasamtök allra fyrirtækja sem starfa í ferðaþjónustu. Samtökin voru byggð á grunni Sambands veitinga- og gistihúsa og lögðu önnur hagsmunasamtök sem störfuðu innan ferðaþjónustunnar niður starfsemi sína á sama tíma. Meginhlutverk SAF er að gæta sameiginlegra hagsmuna félagsmanna sinna, vinna að því að fyrirtækin búi við starfsskilyrði sem gera þau samkeppnishæf á alþjóðamarkaði og vinna að vexti og viðgangi greinarinnar með öllum tiltækum ráðum.

Umsóknarfrestur um starfið er til og með 4. september.