Ferðaárið 2012 fer vel af stað

Erlendir gestir í janúar hafa aldrei verið fleiri og í ár, eða frá því Ferðamálastofa hóf talningar í Leifsstöð fyrir áratug. Um 26 þúsund erlendir gestir fóru frá landinu í nýliðnum janúarmánuði og er um að ræða 3.900 fleiri brottfarir en á árinu 2011. Erlendum gestum fjölgaði því um 17,5% í janúarmánuði á milli ára.

Bretar langfjölmennastir
Af einstaka þjóðernum voru flestir ferðamenn í janúar frá Bretlandi eða 26,6% af heildarfjölda. Bandaríkjamenn voru næstfjölmennastir eða 15,0% af heildafjölda, næstir komu Danir og Norðmenn með 6,6% hlutdeild hvor þjóð, síðan komu Svíar (5,5%), Frakkar (5,3%) og Þjóðverjar (4,9%). Samtals voru framangreindar sjö þjóðir 70,5% af ferðamönnum til landsins í janúar.

Bretum fjölgar um 54%
Ef litið er til einstakra markaðssvæða má sjá verulega fjölgun frá Bretlandi eða um 53,7%. Norður Ameríkönum fjölgar ennfremur umtalsvert eða um 31,1% og sama má segja um ferðamenn sem flokkast undir ,,Annað” en þeim fjölgar um 26,6%. Lítilsháttar fækkun er hins vegar frá Norðurlöndunum (-5,7%) og Mið-/ og S-Evrópu (-8,0).

Svipaður fjöldi Íslendinga fer utan og í fyrra
Ríflega 23 þúsund Íslendingar fóru utan í janúar í ár og er um að ræða svipaðan fjölda og fór utan í janúar í fyrra.
Talningar Ferðamálastofu ná yfir allar brottfarir frá landinu um Leifsstöð.

Skiptingu milli landa í janúar má sjá í töflunni hér að neðan og nánari upplýsingar undir liðnum Talnaefni/Ferðamannatalningar hér á vefnum.