Evrópubúar horfa til vorsins þegar kemur að ferðalögum
Niðurstöður úr nýlegri könnun um ferðaáform Evrópubúa¹ næsta hálfa árið voru birtar á vefsíðu Evrópska ferðamálaráðsins (ETC) í gær. Þetta er í fjórða skiptið sem ráðið lætur framkvæma könnunina en hún hefur verið lögð fyrir helstu ferðamannaþjóðir Evrópu² mánaðarlega frá því í ágúst síðastliðnum.
Niðurstöður sýna meðal annars að:
- Evrópubúar eru nú jákvæðari fyrir ferðalögum en í síðustu könnun sem má rekja til jákvæðra frétta af bóluefnum gegn Covid-19. Um helmingur (52%) Evrópubúa ætlar að ferðast næstu sex mánuðina (des-júní) innanlands eða innan Evrópu, annað hvort í persónulegum tilgangi eða vinnutilgangi. Um er að ræða 5% aukningu á ferðavilja frá síðustu mælingu. Pólverjar (74%), Ítalir (54%) og Frakkar (53%) eru líklegastir að ferðast næstu sex mánuðina.
- Evrópubúar horfa í ríkum mæli til vorsins þegar kemur að ferðalögum en tæplega þriðjungur hefur í hyggju að ferðast á tímabilinu apríl til júní. Margir eru hins vegar óákveðnir um hvenær þeir ætli að ferðast næst (36%). Fáir (12%) ætla að ferðast innan þriggja mánaða eða til loka febrúar.
- 40% hafa nú áform um að ferðast til annarra landa Evrópu, nokkru fleiri en í síðustu mælingu. Ríflega þriðjungur (36%) hefur áhuga á að ferðast innanlands sem gerir sjö prósentustiga fækkun frá síðustu mælingu.
- Traust á flugsamgöngum er að aukast. 52% Evrópubúa lýsa því nú yfir að þeir séu tilbúnir að ferðast með flugi en þetta hlutfall var 49% þegar fyrsta mæling var gerð. Á sama tíma telur lægra hlutfall (17%) flug skapa áhættu fyrir heilsu en þegar könnunin fór fyrst af stað (20%). Spánverjar (67%), Bretar (63%), Ítalir (63%) og Frakkar (61%) eru þær þjóðir sem eru líklegastar til að ferðast með flugi næstu sex mánuðina.
- Áhyggjuefni Evrópubúa eru mörg þegar kemur að ferðalögum til annarra Evrópulanda en þau snúast núna að mestu um hugsanlega sóttkví (15%), það að verða veikur á áfangastað (14%) og fjölgun Covid-19 tilfella á áfangastaðnum (14%). Auk þess hafa þeir áhyggjur af því að verða veikir á ferðalaginu (10%), ferðatakmörkunum (9%), takmörkunum sem gilda um opnunartíma á áfangastað (8%), reglum um afbókanir (7%) og öryggisatriði þegar kemur að flugi og gistingu (6%).
Óvissa fer minnkandi
Óvissan í kringum ferðalög fer minnkandi skv. niðurstöðum kannana ETC og eins líklegt að endurreisn ferðaþjónustunnar sé innan seilingar. Skýrsluhöfundar beina því til áfangastaða að þróa strangar heilsu- og öryggisreglur til að vinna sér inn frekara traust ferðamanna þar sem heilsa þeirra er sett á oddinn og ætti að fella þessar reglur inn í allt markaðsstarf. Fyrirtæki ættu enn fremur að nýta sér þann áhuga sem Evrópubúar hafa sýnt ferðalögum á vormánuðum fyrir sölu vor- og sumarferða.