| Lýsing |
Birt 1. apríl 2025.
Helstu niðurstöður
- Ferðaþjónustan er án efa einn af burðarstólpum íslensks efnahagslífs. Hún stendur undir ríflega 8% af landsframleiðslu, og nærri þriðjungi af
útflutningi. Eftir sterka viðspyrnu í kjölfar heimsfaraldursins stendur greining á tímamótum. Hún hefur slitið barnskónum og tímabil ævintýralegs
vaxtar virðist að baki, líkt og ferðamannatölur síðustu mánaða bera með sér. Ferðamannaspá okkar dregur dám af þessari þróun, þar sem
vöxtur snýst í viðhald. Við spáum lítils háttar fækkun í komum ferðamanna á þessu ári en hógværum vexti á næstu árum.
- Flugfarmboð spilar stóra rullu í íslenskri ferðaþjónustu en breytingar á því geta bæði verið orsök og afleiðing af sveiflum í komu ferðamanna til
landsins. Í október á síðasta ári boðaði PLAY miklar breytingar á viðskiptalíkani félagsins. Félagið leigði frá sér flugvél í vetur, sem leiddi til
færri farþega, og hefur fengið flugrekstrarleyfi á Möltu þar sem þrjár vélar verða starfræktar. Þá hafa erlend flugfélög dregið úr framboði sínu til
landsins. Á móti kemur að Icelandair hyggst auka sætaframboð sitt í ár, sérstaklega utan háannatíma.
- Ísland er á meðal dýrustu áfangastaðanna í Evrópu vegna sterks gengis og hárra launa. Það er jákvætt uppá það að gera að ferðamenn skili
þannig meiru í kassann, en það getur dregið úr samkeppnishæfni landsins. Það kann að vera hluti af ástæðunni fyrir því að hlutdeild íslenskrar
ferðaþjónustu á meðal Norðurlandanna hefur verið að dragast saman.
- Viðskiptahömlur á alþjóðavettvangi gætu dregið úr kaupmætti í Bandaríkjunum og víðar. Hversu mikið ræðst af umfangi tollanna, hvort þeir
verði varanlegir og hvaða viðskiptalönd dragast inn í deilurnar. Við teljum að það muni hafa takmörkuð áhrif á komur ferðamanna en gæti
haft áhrif á tekjur greinarinnar í heild.
- Ferðaþjónustan stendur frammi fyrir ýmsum öðrum áskorunum. Tekjur á hvert laust herbergi (RevPAR) hafa haldist nánast óbreyttar í
krónum talið undanfarin tvö ár á sama tíma og ýmiss kostnaður, þ.m.t. launakostnaður, hefur farið vaxandi. Þá hafa gjaldþrot og vanskil
færst í aukana, starfsfólki fækkað og skemmtiferðaskip hafa afbókað komur sínar vegna nýrra innviðagjalda.
- Þessar áskoranir eru þó aðeins lítils háttar hnökrar í samanburði við þau áföll sem ferðaþjónustan hefur þegar staðið af sér, og fullvíst er að
hún verði áfram ein af meginstoðum íslensks efnahagslífs.
|
