Þingmannaleið Gönguleið

Þingmannaleið (áður Þingmannavegur) var alfaraleið milli Fnjóskadals og Eyjafjarðar. Hægt er að velja hvort byrjað eða endað er í Eyjafirðinum eða Fnjóskadal. Í Eyjafirði byrjar eða endar gangan við Veigastaðaveg við bæinn Eyrarland gegnt Akureyri. Í Fnjóskadal byrjar eða endar gangan við Systragil, stutt frá bænum Hróarsstöðum

Hin forna Þingmannaleið liggur frá bænum Hróarsstöðum í Fnjóskadal yfir Bæjargil og upp með Systragili. Héðan liggur leiðin meðfram læknum og upp með Bæjargili að norðan. Fylgt er stikum inn á hina fornu Þingmannaleið rétt áður en farið er yfir Bæjargil. Gengið er í um 2 km þar til komið er að girðingu, en farið er yfir hana á tröppum (prílu). Þá er haldið í suður yfir Systralæk og upp með Systragili að sunnanverðu. Leiðin er stikuð þar til marka fer fyrir vegarruðningi og greinilegri vörðum. Þingmannaleið hefur verið þétt vörðuð svo að víðast hafa verið um 70 - 80 metrar á milli varða. Áfram er gengið upp með Systragili að sunnanverðu eftir vegslóða. Skömmu eftir að efri heiðarbrún (stalli) er náð liggur leiðin fyrst til suðvesturs og síðan í vestur eftir Systragilshrygg. Á þessari leið má sjá merkilega grjóthleðslu frá árinu 1871, vel og haganlega hlaðin, um 20 metrar að lengd og 3,25 metrar að breidd. Brúin var mikil samgöngubót en á þessum árum var Þingmannavegur aðal samgöngu- og póstleiðin á milli Eyjafjarðarsýslu og Þingeyjarsýslu. Áfram er gengið í vestur eftir varðaðri og upphlaðinni leið, um 500 metra kafla með yfirbyggðu ræsi. Þá er haldið í suðvestur þar til komið er á melás, svokallaðan Járnhrygg (680 m) en þá er háheiðinni náð. Hér opnast mikil fjallasýn til suðvesturs og vesturs. Nokkru síðar liggur leiðin í norður og síðan niður hlíðina Eyjafjarðarmegin. Þá er komið að girðingu en farið er yfir hana á tröppum (prílu) og þaðan er fylgt slóða á norðurbarmi Litlagils niður að bænum Eyrarlandi.