Gilsfjörður - Bitrufjörður

Mjög flott leið um haftið sem tengir Vestfjarðakjálkann við meginlandið. Leiðin er gömul póstleið þannig að styðjast má við vörður og gamlan slóða til þess að ganga yfir heiðina. Á leiðinni er að finna fossinn Gullfoss í Gilsfirði og flott vatn, Krossárvatn, sem úr rennur Krossá niður í Bitrufjörð. Hefja má gönguna hvorum megin sem hentar en athuga þarf að frá enda vegslóða í Krossárdal og upp á heiðina (ca. 3km) er nokkuð seinfarið mólendi. Þar er mælt með góðum ökklastuðningi enda farið um þúfur og grjót. Uppá heiðinni sjálfri og niður í Gilsfjörð er leiðin þó nokkuð auðfarin. Hægt að leggja bílnum að Kleifum í Gilsfirði, en ekkert merkt bílastæði er á staðnum. Sama má segja um Bitrufjarðarhliðina þar sem best er að ganga upp Krossárdalinn sem er hluti af veiðisvæði Krossár og því ekkert merkt bílastæði fyrir göngufólk.Bílastæði: Ef gengið er frá Gilsfirði: Hjá bænum Kleifar. Óskað er eftir því að fólk kynni sig. Ef gengið er frá Bitrufirði: Hjá bænum Einfætingsgil.