Eyðibýlaganga á Langanesi Gönguleið

Heillandi ganga á innanverðu Langanesi, þar sem eyðibýli sveitarinnar eru heimsótt í sínu sérstaka umhverfi. Gengið er frá tjaldsvæði bæjarins og endað hjá bændagistingunni í Ytra Lóni. Mestur hluti leiðarinnar er gott gönguland en á köflum er farið yfir þýft og óslétt land. Athugið að sé þessi leið farin er endastaður töluvert frá byrjunarreit. Hins vegar má vel halda áfram og ganga eftir sveitaveginum, eða sem leið liggur aftur til Þórshafnar. Hér gefst tækifæri til að rannsaka fjörurnar með sínum rekavið og öðrum fjársjóðum. Þá er einnig gengið fram hjá Sauðanesi, sem er fornfrægur kirkjustaður, staðsettur 7 km norðan við Þórshöfn. Prestsbústaðurinn á Sauðanesi er elsta steinhús í Þingeyjarsýslum, hlaðið úr grágrýti árið 1879. Afar sjaldgæf bygging og er einstakt á landsvísu. Þar er hægt að fræðast um lífið á Langanesi á þeim tíma sem búið var í Sauðaneshúsi og hvernig prestsbústaðurinn var í raun miðpunktur samfélagsins á svæðinu.