Súlur Gönguleið

Súlur eru bæjarfjall Akureyrar, fjallstindar sem rísa yfir bænum í suðvestri. Nær Akureyri rís Ytri-súla en litlu sunnar er Syðri-súla sem er hærri, eða 1.213 metrar. Súlur eru að mestu gerðar úr ljósu líparíti sem á uppruna í Öxnadalseldstöðinni, sem var virk fyrir 8-9 milljónum ára. Ekið er upp Súluveg og gengið frá bílastæðinu sem er við enda vegarins í Glerárdalnum. Athugið að frá bílastæðinu við Súluveg er upphaf fleiri gönguleiða m.a. inn að Stíflu, Lamba og upp á Fálkafell. Mikilvægt er því að horfa vel á skilti þegar lagt er af stað. Gönguleiðin upp á Súlur byrjar við lækinn fyrir sunnan bílastæðið. Þar er strax eftir lækinn tekin stefna upp tröppur upp á litla hæð og þaðan áfram að girðingu og tröppur yfir hana. Þaðan liggur leiðin síðan eftir fjárgötum og stígum alla leið upp á Súlur. Leiðin er stikuð. Athugið að gönguleiðin liggur um töluvert af móa og mýrum og má búast við bleitu víða á leiðinni þótt Ferðafélag Akureyrar hafi byggt planka-brýr yfir verstu bleitusvæðin. Slóðin er þar að auki brött á köflum og því er mælt með gönguskóm með góðu gripi og einnig göngustafi.