Átta þúsund fleiri ferðamenn í maí

Um 45 þúsund erlendir ferðamenn fóru frá landinu um Leifsstöð í nýliðnum maímánuði eða um átta þúsund fleiri en í maí 2011.

Aukningin 21,5% milli ára
Ferðamenn í maí voru 21,5% fleiri en í maí í fyrra. Á því ellefu ára tímabili sem Ferðamálastofa hefur talið ferðamenn í Leifsstöð hefur aukningin verið að jafnaði 10,1% milli ára í maímánuði eins og sjá má í töflunni hér til hliðar.

74% ferðamanna af níu þjóðernum
Af einstaka þjóðernum voru flestir ferðamenn í maí frá Bandaríkjunum eða 16,5% af heildarfjölda. Næstfjölmennastir voru Norðmenn (10,6%), Bretar (9,6%) og Þjóðverjar (8,9%). Þar á eftir komu Svíar (7,8%), Danir (6,6%), Frakkar (5,1%), Hollendingar (4,7%) og Kanadamenn (3,9%). Samtals voru þessar níu þjóðir 73,7% af heildarfjölda ferðamanna í maí.

Fjölgun frá öllum markaðssvæðum
Umtalsverð fjölgun var frá öllum markaðssvæðum nema Norðurlöndunum. Þannig fjölgaði N-Ameríkönum um 40,5%, Bretum um 28,9%, Mið- og S-Evrópubúum um 23,3% og þeim sem komu frá löndum sem eru flokkuð undir annað um 29,2%.

Ferðamönnum hefur fjölgað um 20,7% frá áramótum
Frá áramótum hafa 170.560 erlendir ferðamenn farið frá landinu sem er 20,7% aukning frá árinu áður. Bretum hefur fjölgað um 43,8%, N-Ameríkönum um 31,6% og ferðamönnum frá löndum sem flokkast undir ,,annað” um 23,9%. Brottförum Norðurlandabúa hefur hins vegar fjölgað mun minna eða um 6,7% og sama má segja um brottfarir Mið- og S-Evrópubúa sem hefur fjölgað um 7,2% milli ára 2010 til 2011.

Utanferðir Íslendinga
Svipaður fjöldi Íslendinga fór utan í maí nýliðnum og í maí í fyrra eða um 31 þúsund. Frá áramótum hafa um 131 þúsund Íslendingar farið utan, ríflega sex þúsund fleiri en á sama tímabili árið 2011. Aukningin nemur 5,1% milli ára.

Talningar Ferðamálastofu ná yfir allar brottfarir frá landinu um Leifsstöð. Skiptingu milli landa má sjá í töflunni hér að neðan og nánari upplýsingar undir liðnum Talnaefni / Ferðamannatalningar hér á vefnum.
Nánari upplýsingar veitir Oddný Þóra Óladóttir, rannsóknastjóri oddny@ferdamalastofa.is