Stjörnuhlaupshringurinn frá Miðgarði Hlaupaleið

Þessi leið er keppnisleið Stjörnuhlaupsins, árlegs utanvegahlaups sem Hlaupahópur Stjörnunnar hefur haldið frá árinu 2011. Leiðin liggur Garðabæjar megin í Heiðmörk, í landi Vífilsstaða, og er vinsæl æfingaleið hlaupara á svæðinu. Hringurinn hefst við íþróttahúsið Miðgarð, sem stendur við golfvöllinn í Vetrarmýri. Frá Miðgarði er farið eftir slóð austur undir Hnoðraholti og meðfram golfvellinum inn í útivistarskóga Skógræktar Garðabæjar í Smalaholti og áfram um Sandahlíð. Leiðin er upp í móti fyrstu 5 km með hæsta punkt í 150 metra hæð í hlíðinni ofan við Skátaheimilið. Þaðan er leiðin nánast öll niður í móti, með skemmtilegri og langri lækkun niður að Vífilsstaðavatni og til baka í Miðgarð. Samanlögð hækkun er um 200 metrar. Undirlagið er ekki mjög torfært, heldur að mestu þjappaðir moldarstígar eins og víðast hvar í Heiðmörk, mjúkur hestastígur að hluta og nýir malarstígar. Á einum stað þarf að fara með gát yfir akveg. Að öðru leiti er leiðin er örugg og aðgengileg fyrir öll getustig og hentar vel í æfingahlaup. Á sumardögum er nokkur umferð á stígunum, bæði gangandi og hjólandi. Góð aðstaða er í Miðgarði fyrir og eftir hlaup með salernum og skjóli.