Kópaskersviti Gönguleið

Gott er að hefja göngu við fuglaskoðunarskýlið sem er fram á sjávarbakkanum skammt frá versluninni Skerjakollu. Þaðan er gengið eftir götunni smá spöl en svo er hægt að færa sig niður á sjávarbakkann og ganga eftir troðnum stíg þar til komið er að bæjargirðingunni þar sem trappa er yfir hana.  Eftir það er hægt að fara alveg niður í fallega sandfjöru áður en haldið er upp á veginn sem liggur að vitanum. Mikið fuglalíf er í sandvíkinni og fallegt að horfa yfir til þorpsins og út á haf. Frá vitanum er hægt að rölta eftir moldarslóða sem liggur yfir gamla flugvöllinn og svo er beygt aftur inn í þorpið og genginn lítill hringur umhverfis það áður en endað er aftur á upphafsstað. Áform eru um að setja stiga ofan í fjöruna nálægt fuglaskoðunarhúsinu og annan á móts við Duggugerði og verður þá hægt að fara víða ofan í fjöru. Margir bekkir eru á gönguleiðinni og því oft hægt að tylla sér og njóta líðandi stundar.